Kryetari i AAK-së, Ramush Haradinaj, ka akuzuar Qeverina aktuale se ka blerë vota nga deputetët e partive të tjera për të votuar Vjosa Osmanin për presidente.
Ne emisionin Rubikon në Klan Kosova ai u shpreh edhe se ata janë munduar që ta trafikojnë edhe Ligjin për Zgjedhjet, por që nuk iu lejua nga opozita.
“Kemi përshëndetur e i kemi uruar fituesit e zgjedhjeve, në këtë rast Lëvizjen Vetëvendosje për suksesin e arritur në zgjedhje dhe i jemi përgjigjur ftesës për biseda me ta, por ajo që ka pasuar më tutje nuk është se ka lënë një shije të mirë për Kosovën, pra fituesi, Lëvizja Vetëvendosje me 50 për qind e kërkonin votën me kërcënim se ‘ju çojmë në zgjedhje e do të fitojmë më shumë vota kësaj radhe”.
“Një qasje e këtillë e kërcënimit se ‘ju çojmë në zgjedhje nëse s’na votoni kandidaten tonë, ishte disi e jo e drejtë dhe jo e nevojshme sepse ata ishin fitues, dhe ishte çuditshme se nuk u shërbyen me argumente tjera për shembull se nëse shkojmë prapë në zgjedhje do të rrezikohej ekonomia, qytetarët nga pandemia, etj., por ishte kërcënim i pastër se nëse s’na votoni ne do të shkojmë prapë në zgjedhje”.
“Kjo qasje e kërcënimit dhe e nënshtrimit na largoi edhe më shumë nga një mundësi e vlerësimit të asaj që po ndodhë drejt, ishte fakti i një dakordimi i kryeministrit dhe presidentes ishte ligji për zgjedhjet dhe mënyra se u trafikua ligji në mbrëmje, të premten në ora 10 të natës mbyllen dyqanet e restorantet e kafiqat, ndërsa në atë kohë u hapke parlamenti për ligjin që nuk kishte ndonjë urgjencë”.
“Pra, ky ishte momenti i dytë që ishte zhgënjyes dhe tregon se kush janë këta njerëz. Momenti i fundit ishte blerja e votës për presidentin, pra jo marrëveshje politike me partitë, por blerja e votës. Dy nga ta ishin në dakordim me Listën Serbe për deputetin Hoxha dhe Gashi. Kjo është blerje dhe tregtim i votës”.
“Hoxha ishte i sinqertë se tregoi që ‘mu dha një zëvendësministër, ndërsa ne kemi informata për oferta që i janë bërë gjithë deputetëve për votë”.
“Sali Zyba i Lëvizjes Vetëvendosje ka qenë sekseri për vota, ai ka vizituar plot deputetë për vota”.
“Kemi deputetë të tjerë që kanë ardhur me oferta, na kanë treguar se çka i kanë ofruar të tjerëve. Pos te deputetja Reshitaj ka pasur presion edhe te deputetë të tjerë të AAK-së dhe atë presion serioz, në formë të krijimit të një klime përreth se ‘do të kesh këto beneficione e materiale të natyrave tjera, dhe duke qenë kështu s’mund ta uroj presidentin që ka blerë vota”, deklaroi Haradinaj./KlanKosova/
