Kryetari i LSDM-së, Venko Filipçe, deklaroi se ribalanci i dytë i buxhetit brenda një viti dëshmon, sipas tij, menaxhimin e dobët qeveritar të financave dhe ekonomisë. Ai paralajmëroi se në buxhet mungojnë 900 milionë euro.
Filipçe tha se gjendja e buxhetit është alarmante dhe se, krahas mungesës prej 900 milionë eurosh, Fondit të sigurimit pensional dhe invalidor i mungon edhe një miliard euro për pagesën e pensioneve. Sipas tij, stabiliteti buxhetor është seriozisht i rrezikuar, ndërsa mbetet e paqartë se nga cilat burime do të sigurohen paratë për pagat dhe pensionet para Vitit të Ri ose në fillim të vitit të ardhshëm.
Të lidhura
None found
Ai vuri në dukje se, në kohën kur shtetet e tjera kanë nisur diskutimet për buxhetet e vitit 2027, Maqedonia po përgatit ribalancin e dytë brenda të njëjtit vit. Filipçe tha se, pasi ky proces të përfundojë, do të hapet diskutimi për buxhetin e vitit të ardhshëm.
Në konferencën e sotme për shtyp, kreu i LSDM-së deklaroi se ribalanci nuk parashikon rritje pagash apo përmirësim të standardit, por ulje të investimeve kapitale dhe mundësi për huamarrje të reja. Ai rikujtoi se në ribalancin e korrikut deficiti u shtua me arsyetimin se paratë do të përdoreshin për investime kapitale, të cilat tani po shkurtohen, ndërsa deficiti i rritur mbetet.
Sipas Filipçes, planifikimi i dobët pasqyrohet edhe te të ardhurat, parashikimi i të cilave po ulet nga Qeveria, ndërkohë që borxhi publik vijon të rritet.
Ai tha se në korrik Qeveria e ngriti projeksionin e të ardhurave në 379.5 miliardë denarë, por tani po e ul me 5.3 miliardë denarë, në rreth 374 miliardë denarë. Filipçe e cilësoi këtë si tregues të nënfinancimit serioz të të ardhurave dhe të mungesës së kapaciteteve institucionale. Sipas tij, borxhi publik do të arrijë në 12 miliardë euro, duke përfshirë detyrimet e ndërmarrjeve publike, kryesisht ato të Ndërmarrjes publike “Rrugët Shtetërore”. Ai shtoi se gjatë dy vjetëve e gjysmë borxhi është rritur me rreth 4 miliardë euro.
