Komunikimet e zhvilluara në “Telegram” janë bërë pjesë e hetimeve për protestat dhe trazirat e fundit në Itali.
Emisioni investigativ italian “Fuori dal Coro” raportoi se Youssef Siher, 30 vjeç, i ndaluar nga autoritetet dhe i dyshuar si një prej organizatorëve kryesorë të Lëvizjes “17 Tetori”, mund të ketë përdorur një kanal në “Telegram” për të shpërndarë udhëzime operative para zhvillimit të protestave.
Të lidhura
None found
Mes materialeve të shqyrtuara ndodhet një dokument PDF me titull “Revolucioni: udhëzime për përdorim”. Sipas transmetimit, në të jepeshin orientime për të ashtuquajturën mosbindje civile, të frymëzuara edhe nga revolucioni egjiptian i vitit 2011 në sheshin Tahrir të Kajros.
Dokumenti përfshinte edhe këshilla mbi veshjet dhe pajisjet që duhej të kishin protestuesit. Në listë përmendeshin kefijet, bluzat me kapuç dhe dorezat e kuzhinës, të cilat paraqiteshin si mbrojtje ndaj nxehtësisë së krijuar nga bombolat me gaz lotsjellës.
Kanali shërbente, sipas të njëjtit raportim, edhe si një hapësirë për të gjetur persona me role të ndryshme në organizim. Kërkoheshin grafikë për përgatitjen e posterave, operatorë fotografie dhe videoje, si dhe individë që do të merreshin me ndihmën e parë, sloganet dhe megafonët.
Ndërsa protestat afroheshin, komunikimet në grup dyshohet se u përshkallëzuan në gjuhë gjithnjë e më agresive, duke përfshirë ofendime dhe kërcënime kundër forcave të rendit.
Në materialet e publikuara nga emisioni, një prej përdoruesve shkruante se duhej “mbjellë kaos” dhe se duhej krijuar një episod që do të mbetej gjatë në kujtesë. Një tjetër deklaronte se dhuna do të ishte e pashmangshme.
Raportimi përmend gjithashtu biseda ku ngriheshin pyetje për persona që mund të siguronin bomba tymuese, bomba artizanale dhe mjete të tjera shpërthyese rudimentare.
Përmbajtja e këtyre materialeve ka ngritur dyshime mbi mënyrën e organizimit të protestave dhe përfshirjen e mundshme të personave që merrnin pjesë në komunikimet online. Megjithatë, përcaktimi i përgjegjësive konkrete dhe i akuzave ndaj të dyshuarve u takon organeve kompetente, në përputhje me parimin e prezumimit të pafajësisë.
