Lufta në Ukrainë ishte tema kryesore e bisedës telefonike të zhvilluar të premten mes presidentit amerikan Donald Trump dhe atij rus Vladimir Putin, bëri të ditur zëdhënësi i Kremlinit, Dmitry Peskov.
Të lidhura
None found
Peskov u shpreh për mediat shtetërore ruse se Putin kishte mirëpritur disa propozime të paraqitura nga Shtetet e Bashkuara për hapa që mund të kontribuojnë në uljen e tensioneve. Ai nuk zbuloi detaje mbi përmbajtjen e këtyre propozimeve.
Ndërkohë, në Miami u zhvillua një takim ku morën pjesë zyrtarë amerikanë e ukrainas, si dhe përfaqësues nga Gjermania, Franca, Britania, Komisioni Europian dhe NATO. I dërguari i SHBA-së, Steve Witkoff, i përshkroi bisedimet si konstruktive.
Diskutimet u përqendruan te mundësia e mbylljes së konfliktit përpara dimrit dhe krijimit të një paqeje afatgjatë. Në agjendë u përfshinë garancitë e sigurisë, furnizimi me energji, eksporti i drithërave dhe rindërtimi i Ukrainës, ndërsa u trajtua edhe mundësia e anëtarësimit të vendit në Bashkimin Europian.
Çështja territoriale vijon të jetë pengesa më e madhe. Moska kërkon të marrë nën kontroll të gjithë Donbasin, përfshirë edhe territoret që aktualisht administrohen nga Kievi, kërkesë që kundërshtohet nga presidenti Volodymyr Zelensky.
Gjatë telefonatës Trump–Putin u njoftua gjithashtu lehtësimi i kufizimeve amerikane për naftën ruse, me synimin për të rritur furnizimin në tregjet globale. Zelensky e dënoi këtë masë, duke paralajmëruar se të ardhurat e shtuara mund të përdoren për financimin e luftës së Moskës.
Uashingtoni synon të zhvillojë gjatë këtij muaji bisedime më të gjera me Rusinë dhe Ukrainën, por deri tani nuk është përcaktuar një datë zyrtare.
