Një aksident ajror në shtetin Ondo, në jugperëndim të Nigerisë, ka shkaktuar vdekjen e 32 personave që ndodheshin në bordin e një avioni ushtarak.
Të lidhura
None found
Avioni ATR-42, në pronësi të Forcave Ajrore Nigeriane, ishte nisur nga Benin City drejt Lagosit për një mision rutinë. Kontakti me të u ndërpre nga kontrollorët e trafikut ajror në orën 08:13 GMT.
Mbetjet e avionit u lokalizuan më vonë pranë qytetit bregdetar të Igbokodës, në shtetin Ondo, nga ekipet e kërkim-shpëtimit.
Ministri i Aviacionit, Festus Keyamo, konfirmoi rrëzimin, ndërsa presidenti i Nigerisë, Bola Tinubu, shprehu “trishtim të thellë” dhe u dërgoi ngushëllimet familjeve të viktimave.
“E kam udhëzuar Forcën Ajrore Nigeriane të nisë menjëherë një hetim të plotë mbi shkakun e rrëzimit, për të parandaluar ngjarje të tilla në të ardhmen”, deklaroi Tinubu.
Ngjarja është renditur ndër katastrofat ajrore më vdekjeprurëse të viteve të fundit në Nigeri. Autoritetet kanë hapur një hetim për të zbardhur shkaqet e aksidentit.
