Labinot Mirena, asambleist i LDK-së në Kuvendin Komunal të Obiliqit, ka njoftuar dorëheqjen e parevokueshme nga të gjitha strukturat e partisë.
Të lidhura
None found
Vendimi i tij erdhi pas qëndrimit të grupit parlamentar të LDK-së kundër votimit të projektligjit që synon ndryshime në ligjin për Gjykatën Speciale.
Mirena deklaroi se nuk pajtohet me këtë pozicion të partisë, duke e konsideruar atë si një mospajtim të rëndësishëm në aspektin parimor dhe personal.
“Ky vendim shpreh mospajtimin tim të thellë me qëndrimin e LDK-së ndaj krerëve të UÇK-së që po gjykohen në Hagë. Për mua, kjo nuk është vetëm çështje politike apo partiake, por çështje parimesh dhe bindjesh personale, mbi të cilat nuk mund të bëj kompromis”, ka shkruar Mirena.
Ai ka bërë të ditur se do ta vijojë mandatin në Kuvendin Komunal të Obiliqit si asambleist i pavarur.
Sipas Mirenës, qëndrimi i LDK-së për këtë çështje nuk përputhet me vlerat dhe bindjet që ai mbron.
