Shannon Shorter u përzgjodh lojtari më i vlefshëm i ProCredit Superkupës së Kosovës, pasi pati rol kyç në suksesin historik të Bashkimit kundër Trepçës.
Të lidhura
None found
Amerikani ishte ndër protagonistët e finales, ku skuadra prizrenase triumfoi 103:93 pas vazhdimeve. Ai kontribuoi me 23 pikë, 13 kërcime dhe katër asistime.
Shorter la gjurmë në çastet vendimtare të kohës së rregullt, kur realizoi një gjuajtje nga largësia dhe e kaloi Bashkimin në epërsi, 87:84.
Trepça, megjithatë, arriti të barazonte në sekondat e fundit, falë një tresheje spektakolare të realizuar nga gjysma e fushës, duke e çuar finalen në vazhdime.
Gjatë pesë minutave shtesë, Bashkimi mori kontrollin e ndeshjes: shënoi 16 pikë, përballë vetëm gjashtë të Trepçës, dhe siguroi fitoren 103:93.
Për Bashkimin, ky ishte trofeu i parë i Superkupës së Kosovës. Me këtë fitore, skuadra nga Prizreni plotësoi koleksionin e trofeve vendore, duke shtuar Superkupën krahas titujve të tjerë të fituar në basketbollin kosovar.
Suksesi në Rahovec shënoi një tjetër moment të veçantë në historinë e Bashkimit, ndërsa Shorter e përfundoi mbrëmjen me çmimin MVP, pas paraqitjes së tij vendimtare.
