Kryetari i Nismës, Fatmir Limaj, deklaroi se aktgjykimi i Gjykatës Speciale në Hagë ka forcuar te qytetarët e Kosovës ndjenjën e krenarisë për Ushtrinë Çlirimtare të Kosovës dhe rolin e saj në çlirimin e vendit.
Të lidhura
None found
Gjatë protestës së sotme “Jo në emrin tim”, Limaj tha se vendimi ka nxjerrë në pah atë që, sipas tij, ka qenë gjithmonë e qartë: UÇK-ja është pjesë e identitetit kombëtar dhe e lirisë së Kosovës.
Ai u shpreh se situata e krijuar pas vendimit të Hagës ka dëshmuar lidhjen e fortë të popullit me UÇK-në. Sipas Limajt, kjo është reflektuar edhe te djemtë dhe vajzat që ndihen krenarë për baballarët e tyre, pasi kontributi i tyre solli lirinë, shtetin dhe gjithçka që gëzohet sot.
Limaj theksoi se aktgjykimi nuk duhet parë vetëm në këndvështrimin e individëve që po gjykohen, pasi ai, sipas tij, lidhet me një përpjekje për të fshirë dhe rishkruar historinë e Kosovës.
“Ky aktgjykim nuk ka të bëjë vetëm me individin. Ai synon të fshijë një histori dhe të shkruajë një tjetër. Shteti dhe populli i Kosovës nuk do të lejojnë që historia t’u rishkruhet”, deklaroi ai.
