Sali Berisha mori pjesë sot në Kuvendin e Partisë Demokratike të zhvilluar në Krujë.
Në fjalën e mbajtur para demokratëve, kreu i PD-së u ndal sërish te protesta, për të cilën deklaroi se partia e tij do të angazhojë të gjithë potencialin që ka. Ai tha se kjo protestë e ka bërë kryeministrin Edi Rama “njeriun më të urryer”, jo vetëm në Shqipëri, por edhe në Europë.
Të lidhura
None found
“Asaj proteste do t’i japim mbështetjen tonë me të gjithë potencialin. Është një protestë qytetare, të cilën ne e respektojmë, sepse jemi njerëz të moralit.
Dikush mund të pyesë se çfarë i kanë bërë Ramës. Po e them unë: Nëse ekziston një protestë që e ka zvarritur Ramën çdo natë në bulevard, është pikërisht ajo. E ka shndërruar në njeriun më të urryer, jo vetëm në Shqipëri, por edhe në Europë. Ai nuk do ta marrë më kurrë veten, prandaj edhe ne do të jemi atje me fibrën tonë qytetare.
Parrullat dhe sloganet e një grupi armiqsh tanë, që janë opozita e opozitës, nuk do të na bëjnë të largohemi nga sheshi. Ne jemi burrat dhe gratë e sheshit. Kërkesat që ata kanë janë të njëjta me tonat”, deklaroi Berisha.
