Një mjet fluturues pa pilot, i cili gjatë natës kishte hyrë në hapësirën ajrore lituaneze, është rrëzuar nga avionë luftarakë të NATO-s. Lajmi u konfirmua nga presidenti i Lituanisë, Gitanas Nauseda.
Të lidhura
None found
Përmes një postimi në platformën X, Nauseda tha se droni u neutralizua menjëherë nga avionët e aleancës, por nuk dha informacion për shtetin të cilit i përkiste. Presidenti e vendosi ngjarjen në kuadër të përshkallëzimit të luftës së Rusisë kundër Ukrainës.
“Ndërsa Rusia intensifikon agresionin e saj kundër Ukrainës, një gatishmëri e tillë është jetike për rajonin tonë. Së bashku me aleatët tanë të NATO-s, Lituania do të mbrojë hapësirën e saj ajrore”, deklaroi Nauseda.
Ministri i Jashtëm lituanez, Kestutis Budrys, shprehu mirënjohjen për aleatët e NATO-s, duke vlerësuar praninë dhe ndihmën e tyre në garantimin e sigurisë së vendit.
“Falënderimet tona më të sinqerta shkojnë për aleatët, prania e të cilëve ndihmon në mbrojtjen e qiejve tanë dhe forcimin e sigurisë sonë”, shkroi Budrys në X. Ai shtoi se NATO vijon të jetë vigjilente, e angazhuar dhe e përgatitur për t’iu përgjigjur kërcënimeve të mundshme.
Transmetuesi publik lituanez LRT, duke iu referuar Qendrës Kombëtare për Menaxhimin e Krizave, raportoi se droni u rrëzua në një zonë rurale pranë liqenit të Kaunasit, në qendër të Lituanisë. Deri tani, autoritetet nuk kanë bërë të ditur të dhëna të tjera për origjinën ose misionin e mjetit.
Ngjarja ndodhi në një kohë kur tensionet në krahun lindor të NATO-s mbeten të larta. Lufta në Ukrainë vijon, ndërsa vendet baltike kanë forcuar masat e sigurisë përballë kërcënimeve të mundshme nga Rusia.
