Nisma “Prania Besnike”, do të përfshijë tashmë edhe ministrat, bëri të ditur Ministrja e Shtetit për Marrëdhëniet me Parlamentin, Erjona Ismaili, pas përfundimit të mbledhjes së qeverisë.
Ismaili deklaroi se zgjerimi i nismës në nivel ministrash do të nisë të premten e javës së ardhshme. Sipas saj, çdo ministër do të publikojë kalendarin përkatës të takimeve, me synimin për të qenë më pranë qytetarëve dhe për t’i dhënë një vlerë të shtuar komunikimit të drejtpërdrejtë e transparent me ta.
Të lidhura
None found
Përmes këtyre takimeve do të mundësohet identifikimi dhe ndjekja nga afër e problematikave ose çështjeve që kërkojnë vëmendjen e ministrit dhe ndërhyrjen institucionale.
Ministrja theksoi se nisma synon të fuqizojë dialogun e hapur mes anëtarëve të kabinetit dhe qytetarëve, duke u krijuar këtyre të fundit mundësinë që shqetësimet e tyre t’ua paraqesin drejtpërdrejt drejtuesve të ministrive.
