Në samitin ndërkombëtar të hapësirës në Paris, presidenti francez Emmanuel Macron theksoi se kontinenti duhet të forcojë pavarësinë në këtë sektor strategjik dhe të mos mbetet thjesht një pasagjer në hapësirë.
Të lidhura
None found
Ai bëri thirrje për krijimin e një programi europian të fluturimeve me ekuipazh, i cili duhet të materializohet brenda një dekade. Macron pranoi gjithashtu se përpjekjet aktuale në fushën hapësinore europiane janë ende të brishta dhe kanë nevojë për investime më të mëdha.
Presidenti përcaktoi dhe objektiva konkretë: brenda dy viteve, kapsula europiane “Nyx” duhet të lidhet me Stacionin Ndërkombëtar Hapësinor. Pas pesë vjetësh, moduli “Argonaut” synohet të ulet në Hënë, ndërsa në harkun e dhjetë viteve një kapsulë europiane me astronautë duhet të niset nga baza hapësinore Kourou në Guajanën Franceze.
Drejtori i Agjencisë Europiane të Hapësirës, Josef Aschbacher, vlerëson se ky projekt kërkon rreth një miliard euro në vit. Sipas tij, blerja e fluturimeve nga operatorë të huaj do t’i kushtonte Europës pesë miliardë euro gjatë dhjetë viteve të ardhshme.
Vendet anëtare të agjencisë pritet të marrin një vendim për hapat e mëtejshëm në takimin ministror të dhjetorit.
