Kryeministri në detyrë, Albin Kurti, priti të hënën në Prishtinë ambasadoren e sapoemëruar të Suedisë, Åsa Pehrson. Sipas njoftimit të Qeverisë, diplomatja suedeze deklaroi se prej kohësh kishte dëshiruar të shërbente në Kosovë.
Të lidhura
None found
Gjatë takimit, Kurti theksoi mirënjohjen për mbështetjen që Suedia i ka ofruar Kosovës në periudhën para dhe pas shpalljes së pavarësisë.
“Si një vend mik dhe ndër pesë donatorët tanë më të mëdhenj, Suedia u bë shtëpi e shumë familjeve shqiptare të Kosovës”, u shpreh Kurti, duke kujtuar gjithashtu se Suedia strehoi një numër të madh minatorësh të Trepçës pas grevës së vitit 1989.
Ai veçoi edhe angazhimin e mijëra ushtarëve suedezë në misionin e KFOR-it, bëri të ditur kryeministria, ndërsa lajmi u transmetua nga KosovaPress.
Sipas njoftimit, biseda u përqendrua te mundësitë për zgjerimin e bashkëpunimit në ekonomi, tregti, energjetikë dhe mbrojtje. Në takim u shqyrtuan gjithashtu zhvillimet politike dhe ato rajonale.
Kurti tregoi se me ambasadoren Pehrson ishte takuar edhe 20 vjet më parë, në Stokholm.
