Një defekt në infrastrukturën e Amazon Web Services shkaktoi të premten ndërprerje të përkohshme në shumë faqe interneti dhe aplikacione të përdorura gjerësisht, duke i lënë miliona përdorues pa mundësi për të aksesuar shërbimet e tyre të zakonshme dixhitale.
Të lidhura
None found
Sinjalet e para për probleme u shfaqën rreth orës 06:40 me orën e Bregut Lindor të SHBA-së. Sipas të dhënave nga Downdetector, një platformë që monitoron raportimet e përdoruesve për ndërprerje online, vështirësi u evidentuan në shërbime si Apple Pay, DoorDash, Reddit, Hulu dhe rrjeti i PlayStation.
Burimi i ndërprerjes u gjurmua në një defekt të konektivitetit brenda rajoni US-West-2 të Amazon Web Services, i cili ndodhet në Oregon. Kompania konfirmoi zyrtarisht incidentin në orën 04:40 të mëngjesit me kohën e Paqësorit, që përkon me 07:40 në Bregun Lindor, edhe pse sinjalet e përdoruesve kishin filluar të mbërrinin afërsisht një orë më parë.
Pak pas orës 09:00 të mëngjesit me kohën Lindore, kompania njoftoi se problemet ishin zgjidhur. Gjatë gjithë incidentit, nuk pati asnjë tregues për humbje të të dhënave apo për një dështim të plotë të rrjetit global të Amazon.
Një zëdhënës i AWS deklaroi se kompania ishte përballur me vështirësi konektiviteti në rajonin e Oregonit, por theksoi se të gjitha shërbimet tashmë ishin rikthyer në funksionimin e tyre të rregullt.
Lista e shërbimeve të infrastrukturës së prekur u zgjerua gjatë analizës së incidentit. Fillimisht, AWS përmendi pesë shërbime të ndikuara, por më pas shtoi në listë edhe Global Accelerator dhe Amazon Elastic Container Service (ECS). Ky përditësim tregoi se ndërprerja mund të ketë prekur shtresa të ndryshme të rrjetit në Oregon, dhe jo thjesht një produkt të izoluar. Shërbimet e konfirmuara si të prekura ishin: AWS Direct Connect, Global Accelerator, Internet Connectivity, IoT Core, Amazon API Gateway, Amazon Elastic Compute Cloud (EC2) dhe Amazon ECS.
Për të kuptuar pse një problem i kufizuar në një rajon gjeografik mund të ketë pasoja kaq të gjera, mjafton të shohësh funksionin e këtyre shërbimeve. Amazon EC2 ofron serverat virtualë ku mbështeten shumica e faqeve dhe aplikacioneve. API Gateway shërben si urë komunikimi për sisteme të ndryshme online, ndërsa ECS përdoret për të ekzekutuar dhe administruar aplikacionet në këta servera. Ndërkohë, Global Accelerator optimizon rrugën e përdoruesve drejt shërbimeve online. Një defekt në Internet Connectivity ose Direct Connect mund të bllokojë rrugën e bizneseve dhe përdoruesve për të mbërritur te sistemet e strehuara në rajonin e prekur, edhe nëse ato sisteme teknikisht janë ende në punë.
Efektet u ndjenë menjëherë nga konsumatorët. Disa kompani që varen nga infrastruktura e AWS nxituan të nxjerrin njoftime dhe t’u kërkonin falje përdoruesve për mungesën e aksesit. Një prej tyre shkroi në platformën X se “një ndërprerje e madhe e AWS në Amerikë po shkakton probleme në shërbime”, ndërsa një përdorues shtoi me humor se “AWS nuk po funksionon dhe po shkakton probleme në një pjesë të madhe të internetit. Ju lutemi, prisni”.
Një nga komunitetet më të zëshme ishte ai i lojtarëve të PlayStation, të cilët raportuan shkëputje të menjëhershme nga lojërat dhe pamundësi për të nisur transmetime të drejtpërdrejta. Një përdorues shprehu konfuzionin e tij: “U përpoqa të nisja një transmetim, por nuk mund ta hap lojën. A ka probleme edhe dikush tjetër me lidhjen e PlayStationit?”.
Sipas statistikave të Downdetector, rreth 30 për qind e sinjaleve për AWS kishin të bënin me Amazon EC2. Pjesa tjetër e raportimeve ishte e ndarë: 29 për qind përmendnin rajonin US-West-2 në Oregon, dhe 23 për qind e lidhnin problemin me rajonin US-East-1 në Virxhinian Veriore. Duhet theksuar se këto shifra pasqyrojnë perceptimet e përdoruesve dhe jo një matje zyrtare të klientëve apo shërbimeve të ndikuara.
Ky incident vuri në dukje edhe një herë sesa thellësisht është e varur ekonomia dixhitale moderne nga një grusht gjigantësh të teknologjisë cloud. Edhe një ndërprerje kalimtare dhe rajonale mund të gjenerojë një efekt domino, duke ndikuar në një gamë të gjerë aplikacionesh dhe shërbimesh thelbësore në internet.
