Partneriteti mes Kylian Mbappes dhe kompanisë amerikane të veshjeve sportive Nike mund të përfundojë së shpejti, pas afro dy dekadash bashkëpunim.
Mediat franceze raportojnë se ylli i Real Madridit e ka ndërprerë kontratën me Nike në fund të muajit të kaluar. Ky zhvillim i hap rrugën një marrëveshjeje të mundshme me një nga markat rivale të pajisjeve sportive.
Të lidhura
None found
As futbollisti dhe as kompania amerikane nuk kanë dalë deri tani me një konfirmim zyrtar lidhur me këto raportime.
Mbappe iu bashkua Nike që në moshën tetëvjeçare, çka e rendit partneritetin e tyre mes marrëdhënieve më jetëgjata të sponsorizimit në futbollin modern.
Gjatë viteve, sulmuesi francez është kthyer në një nga ambasadorët më të rëndësishëm të markës dhe në një prej figurave kryesore të saj në tregun botëror të futbollit.
Për këtë arsye, përfundimi i mundshëm i marrëveshjes do të përbënte një goditje të madhe për Nike.
Përfaqësuesit e Mbappes kanë zgjedhur të mos i komentojnë deri më tani lajmet, ndërsa ende nuk dihet se cila markë mund ta furnizojë atë me pajisje sportive në të ardhmen.
“Të gjitha opsionet janë aktualisht të hapura dhe publiku do të njoftohet në kohën e duhur për hapat e ardhshëm në vazhdim të karrierës së tij”, ka deklaruar një burim pranë futbollistit.
Nëse ndarja zyrtarizohet, largimi i Mbappes nga Nike pritet të ketë ndikim të konsiderueshëm në tregun e sponsorizimeve sportive, pasi francezi konsiderohet një nga futbollistët më të marketueshëm në botë.
