Kryeministri zhvilloi një takim informues me drejtuesit e bashkive që parashikohet të bashkohen, ku u shpjegua reforma e propozuar nga Partia Socialiste dhe u diskutuan hapat që do të ndërmerren në vijim.
Sipas raportimit të gazetarit të Top Channel, Muhamed Veliu, nisma është konceptuar si një reformë për të gjithë Shqipërinë dhe jo për një bashki të veçantë.
Të lidhura
None found
Gjatë takimit, Rama mësohet të ketë deklaruar: “Reforma do të ecë përpara”.
Rezultatet e Reformës Administrative-Territoriale të vitit 2014 kanë treguar se bashkimi i bashkive sjell përfitime të përbashkëta, duke rritur kapacitetet, përmirësuar shërbimet dhe mundësuar një administrim më efikas.
Edhe bashkimi i parashikuar për Divjakën dhe Dimalin synon që përfitimet të shtrihen te të gjithë qytetarët. Brenda njësisë së re vendore, qytetet do të vazhdojnë të kenë një rol të përcaktuar qartë, ndërsa shërbimet që ofrohen aktualisht do të ruhen.
Një prej garancive kryesore për qytetarët është që shërbimet e ofruara sot nga bashkitë ekzistuese të mos cenohen.
Procesi do të vazhdojë përmes konsultimeve të nevojshme me pushtetin vendor, komunitetet dhe të gjithë aktorët e përfshirë. Synimi është krijimi i një organizimi vendor më funksional, më eficient dhe më afër qytetarëve.
