Lojtari i Bayern Munich probleme me mushkëritë nga Covid 19

Joshua Kimmich nuk ka luajtur për Bayern Munich për më shumë se një muaj pasi u infektua me koronavirus dhe tani do të humbasë pjesën e mbetur të vitit 2021.

Kimmich, i cili ende nuk është vaksinuar kundër virusit, nuk ka luajtur për Bayernin që nga 6 nëntori.

26-vjeçari konsiderohej një kontakt i ngushtë i shokut të skuadrës së Bayernit, Niklas Süle, i cili dha një rezultat pozitiv të testit PCR ndërsa ishte në detyrë me Gjermaninë muajin e kaluar.

Pasi kaloi një periudhë izolimi, Kimmich u detyrua të karantinohej përsëri kur u klasifikua si kontakt i një rasti tjetër të dyshuar Covid-19. Ai më pas doli pozitiv për virusin më vonë në nëntor.

Kimmich ka deklaruar se nuk është i gatshëm të marrë një vaksinë kundër koronavirusit derisa të dihet më shumë për efektet e mundshme afatgjata.

Edhe pse Kimmich nuk vuan më nga Covid-19, Bayern ka konfirmuar se ai nuk do të kthehet në fushë deri në janar.

Kimmich shpjegoi se kjo ishte për shkak të “infiltrimeve të lehta” në mushkëri, që do të thotë se ai nuk ka qenë në gjendje të stërvitet plotësisht.

“Jam i lumtur që izolimi im i shkaktuar nga koronavirusi ka përfunduar”, tha Kimmich në një deklaratë të publikuar në faqen zyrtare të Bayernit.

“Unë jam duke bërë shumë mirë, por nuk jam ende në gjendje të stërvitem plotësisht për shkak të infiltrimeve të lehta në mushkëri. Prandaj do të bëj disa stërvitje rehabilituese dhe mezi pres që të rikthehem plotësisht në veprim në janar.”/h.ll/albeu.com


Shtuar 10.12.2021 17:38