Thomas Brdaric ka shpjeguar se u largua nga Malisheva pasi, sipas tij, klubi kosovar nuk i përmbushi vazhdimisht marrëveshjet mes tyre.
Të lidhura
None found
Në një intervistë për Transfermarkt në Gjermani, trajneri gjerman tha se, ndonëse rezultatet dhe puna sportive po ecnin mirë, rrethanat në klub nuk i lejonin ta vijonte bashkëpunimin.
“Në përgjithësi, situata nuk ishte më e përshtatshme. Detyrimet mbeteshin vazhdimisht të papërmbushura. Përfundimisht, u detyrova të vendos për veten dhe, mbi të gjitha, për familjen time”, u shpreh Brdaric.
Ai e përshkroi largimin si një zgjedhje shumë të vështirë. Trajneri tha se ishte i kënaqur me punën në fushë dhe kishte ndërtuar marrëdhënie të mira me futbollistët.
“Për mua, sigurisht, ishte një vendim jashtëzakonisht i vështirë. Jam profesionist dhe, sa i përket aspektit sportiv, gjithçka po shkonte shumë mirë”, deklaroi ai.
“Më vjen keq sidomos për lojtarët, pasi kishim punuar së bashku vërtet mirë”, shtoi trajneri gjerman.
Fjalët e Brdaricit tregojnë se problemet jashtë fushës ndikuan në vendimin për t’u ndarë nga Malisheva, pavarësisht ecurisë së mirë sportive.
