Gjatë Forumit Ministror BE-Ballkani Perëndimor për Drejtësinë dhe Punët e Brendshme, që po mbahet në Budva, ministri i Drejtësisë i Maqedonisë së Veriut, Jeton Shasivari, zhvilloi dy takime bilaterale me përfaqësues të Kosovës: ministrin e Punëve të Brendshme, Xhelal Sveçla, dhe ministren e Drejtësisë, Donika Gërvalla.
Me Sveçlën, Shasivari diskutoi për zgjerimin e bashkëpunimit në siguri, për koordinimin mes institucioneve dhe për përpjekjet kundër krimit të organizuar e korrupsionit.
Të lidhura
None found
Sipas Shasivarit, bashkëpunimi mes dy vendeve ka peshë të veçantë për shkak të fqinjësisë dhe lidhjeve të afërta mes qytetarëve, por edhe të përgjegjësisë së përbashkët për sigurinë, sundimin e ligjit dhe stabilitetin në rajon.
Ai nënvizoi gjithashtu nevojën që institucionet e të dyja vendeve të shkëmbejnë përvoja dhe të bashkëpunojnë më intensivisht.
Në bisedën me Gërvallën, vëmendja iu kushtua forcimit të bashkëpunimit në drejtësi, luftës ndaj korrupsionit dhe çuarjes përpara të reformave në përputhje me standardet evropiane.
Shasivari bëri të ditur se në takim u rikonfirmuan marrëdhëniet e shkëlqyera mes dy vendeve. Ai theksoi rëndësinë e lidhjeve më të forta institucionale në drejtësi, veçanërisht për shkëmbimin e përvojave, konsolidimin e sundimit të ligjit, luftën kundër korrupsionit dhe përparimin e reformave sipas standardeve evropiane.
Duke e cilësuar Kosovën partner të rëndësishëm të Maqedonisë së Veriut, Shasivari vlerësoi se bashkëpunimi duhet të vijojë dhe të sjellë rezultate konkrete, në mënyrë që institucionet të bëhen më efikase dhe drejtësia të gëzojë besimin e qytetarëve.
