Policia ka ndaluar një 35-vjeçar nga fshati Buçim i Radovishit, pasi në automjetin e tij u zbuluan 14.440 euro, prejardhjen e të cilave nuk arriti ta dëshmonte.
Të lidhura
None found
Ministria e Punëve të Brendshme njoftoi se më 13 gusht, në rrugën magjistrale Radovish–Shtip, afër kryqëzimit që çon drejt fshatit Buçim, është ndalur për kontroll një automjet i tipit “Audi”. Në të ndodhej M.V., ndaj të cilit më parë ishte vendosur masë kujdesi – ndalim për largim nga shtëpia, për shkak të dyshimeve për veprën penale të prodhimit dhe shpërndarjes së paautorizuar të drogës.
Gjatë kontrollit të automjetit, zyrtarët policorë gjetën para në valuta të ndryshme. Lidhur me rastin u informua edhe prokurori publik.
MPB-ja bëri të ditur se M.V. nuk kishte paraqitur asnjë dëshmi për prejardhjen e 14.440 eurove të sekuestruara.
Një ditë më vonë, më 14 gusht, 35-vjeçari doli para gjykatësit në Gjykatën Themelore në Gjevgjeli. Gjykata i caktoi paraburgim prej 30 ditësh, ndërsa më pas ai u transferua në Burgun e Shkupit.
