Ministri i Punëve të Jashtme dhe Tregtisë së Jashtme, Timço Mucunski, vlerësoi se vendi ka arritur pjekurinë dhe kapacitetin e nevojshëm për të kapërcyer ndasitë etnike dhe për të krijuar një shoqëri të mirëfilltë civile. Sipas tij, vëmendja duhet të drejtohet para së gjithash te sfidat e shekullit të 21-të dhe realiteti i kohës së sotme, pasi institucionet, sistemi dhe shteti, mbi të gjitha, u përkasin qytetarëve.
Të lidhura
None found
Këto qëndrime Mucunski i paraqiti gjatë panelit të diskutimit “E ardhmja e Marrëveshjes së Ohrit dhe ndërtimi i paqes së qëndrueshme”, të organizuar me rastin e 25-vjetorit të Marrëveshjes së Ohrit.
Ai sqaroi se diskutimi i sotëm nuk synon rikthimin te viti 2001, por kërkon t’i japë përgjigje pyetjes se çfarë vendi dëshirojmë të kemi në vitin 2051. Kjo, sipas ministrit, nënkupton nxjerrjen e mësimeve nga e kaluara, duke e përqendruar shumë më tepër vëmendjen te zhvillimi i ardhshëm i vendit.
Mucunski nënvizoi se të drejtat kanë karakter të përhershëm, ndërsa shoqëritë duhet të vazhdojnë të ecin përpara. Ai theksoi se të drejtat e fituara në aspektin kushtetues-juridik, si edhe ato që burojnë nga kuptimi më i gjerë i të drejtave të njeriut, nuk mund të rishikohen apo të vihen në pikëpyetje.
Si shqetësimin e tij më të madh politik në shoqëri, ministri përmendi praninë e individëve dhe subjekteve politike, kryesisht partive, që përpiqen ta paraqesin veten si pronarë të një komuniteti të caktuar mbi baza etnike.
Sipas Mucunskit, këto subjekte sillen sikur vetëm ato mund t’i mbrojnë të drejtat e një bashkësie etnike ose të kujdesen për ruajtjen e stabilitetit të marrëdhënieve ndëretnike në shtet. Ai paralajmëroi se kjo është teza më e rrezikshme që mund të lejohet të ekzistojë në vend.
