Kryeministri i RMV-së, Hristijan Mickoski, ka deklaruar se nuk ka synim të garojë për president të shtetit, ndërsa ka nënvizuar se në cilësinë e kryetarit të OBRM-PDUKM-së do të prijë drejt një tjetër fitoreje të madhe kundër LSDM-së në zgjedhjet e ardhshme parlamentare.
Të lidhura
None found
“Kur ta përfundoj këtë etapë të jetës sime si Kryeministër, do të rikthehem në fakultet te studentët. Asnjëherë nuk kam thënë se kur do të ndodhë kjo, nëse pas një viti, pesë apo dhjetë. Ata njerëz që më druhen mua, dhe që vazhdimisht i shoh duke parashikuar njëfarë fundi, do të duhet të bëjnë pak më shumë përpjekje që kjo të zgjasë më pak, ndërsa unë, nga ana ime, do të mundohem edhe më shumë që të zgjasë më tepër.
Çfarë nënkupton kjo? Do të thotë se kam ndërmend që, si President i OBRM-PDUKM-së, të udhëheq bindshëm drejt një tjetër fitoreje të madhe parlamentare, ku do të isha i kënaqur nëse arrijmë ta përmirësojmë rezultatin e atyre zgjedhjeve krahasuar me atë që kishim më shumë se dy vjet më parë. Kam ende shumë gjëra për të bërë për qytetarët dhe për shtetin, sepse nga ky pozicion mund të shoh qartë se çfarë është bërë gabim gjatë dekadave të fundit.
Qytetarët meritojnë kushte më të mira, unë jam i motivuar dhe po punoj më shumë se kurrë më parë në jetën time. Përpiqem të ndihmoj këdo që kam mundësi, sepse nuk jam mrekullibërës dhe nuk mund t’u vij në ndihmë të gjithëve. Dua të ndihmoj dhe të bëj mrekulli. Megjithatë, brenda mundësive të mia, mundohem gjithmonë të jap ndihmë dhe, natyrisht, të bëj atë që qytetarët presin nga unë, pra të zbatoj drejtësinë brenda kompetencave që kam si Kryeministër. Prandaj, edhe një herë konfirmoj se nuk kam ambicie të jem kandidat për president”, ka thënë Mickoski./Telegrafi/
