Zëvendësministri i Bujqësisë, Pylltarisë dhe Ekonomisë së Ujërave, Albrim Hoxha, zhvilloi një vizitë pune në fshatrat e Komunës së Çashkës dhe të Velesit, ku u takua me prodhues të duhanit dhe orizit, me blegtorë, si edhe me fermerë të profileve të ndryshme.
Kjo vizitë u realizua në kuadër të aktiviteteve të rregullta në terren, me synim forcimin e komunikimit me komunitetet rurale dhe promovimin e mundësive që ofrohen për zhvillimin e bujqësisë dhe blegtorisë.
Të lidhura
None found
Gjatë qëndrimit në terren, Hoxha bisedoi drejtpërdrejt me fermerët në shtëpitë, oborret dhe lokalet e fshatrave, duke u njohur nga afër me angazhimin e tyre të përditshëm dhe me interesimin që ata kanë për masat dhe programet mbështetëse të Ministrisë.
Në këto takime u fol për mundësitë e zgjerimit të prodhimit bujqësor dhe blegtoral, për investimet në ferma, si dhe për shfrytëzimin e programeve që janë në dispozicion të sektorit bujqësor.
Hoxha vlerësoi se kontakti i drejtpërdrejtë me fermerët është mënyra më e mirë për të kuptuar nevojat reale në terren dhe për ta orientuar mbështetjen aty ku ajo jep rezultatet më të mëdha.
