Rama qahet nga Durrësi: Unë një copë katunar jam

Pasditen e sotme, Edi Rama ishte në qytetin e Durrësit në kuadër të ditës së fundit për fushatën elektorale për zgjedhjet e 25 Prillit.

Në fjalën e tij përpara të pranishmëve që kishin mbushur stadiumin “Niko Dovana” komentoi me nota humori, por edhe e sulmoi hapur PD-në dhe opozitën. Edi Rama u premtoi durrsakëve se do të bëjë portin turistik në mandatin e tretë.

“Durrësi do të bëhet Dubai i Mesdheut. Marina e Durrësit do të jetë e binjakëzuar ma marinën e Dubait. Kur të shikojnë cfarë ushqimesh kemi ne, mish të freskët, do i thonë Nusretit, nuk duam më me të parë me sy. Qeshni, qeshni, këtu do të jemi. Do të vij prapë në 2025 dhe do u them a e mbani mend” tha Rama.

“Mua më njihni, e dini që i rri punës mbi kokë, ditë natë. Nuk jam aq i mirë sa për t’u marrë për dhëndër, por shyqyr jam i martuar, nuk kam dalë për të kërkuar nuse, jam shumë i lumtur me gruan që kam. Kush nuk më pëlqen të lëvizë telekomandën. Nuk i pëlqejnë çitjanet e mia? Unë një copë katunar jam, këta modernët të shikojnë pantallonat e Likes, të Saliut, ato këpucët e Lulit që duken sikur nuk kanë këmbë brenda dhe nuk kanë nevojë të më pëlqejnë mua për top model. Për gamor pune si unë nuk keni” tha Rama.

Shtuar 23.04.2021 18:46