Që në orët e para të mëngjesit, tregu i shumicës në Korçë nis aktivitetin, por për shumë qytetarë blerjet e përditshme janë kthyer në një vështirësi të madhe. Pensionistët, ndër klientët e rregullt të këtij tregu, shprehen se të ardhurat e tyre nuk mjaftojnë për ushqime, fruta dhe perime.
Një pensioniste që jeton në Greqi dhe ndodhet në Korçë për pushime tregon se çmimet në Shqipëri i janë dukur dukshëm më të larta krahasuar me ato në Greqi.
Të lidhura
None found
“Të ndryshme, çfarë të gjej. Shumë të shtrenjta. Unë jetoj në Greqi. Në krahasim me të Greqisë janë shumë të shtrenjta dhe me rrogën që marrin, janë shumë të shtrenjta. Bleva se jam e detyruar se më duhen. Pa ngrënë do rri?” thotë ajo.
Pensionistë të tjerë tregojnë se, për shkak të pensioneve të ulëta, zgjedhin vetëm artikujt me çmimin më të lirë.
“Ku i blejmë me këto pensione të pakta që janë? Ku e arrijmë dot? Vijmë, marrim ndonjë gjë, ndonjë domate të lirë. Ku i përballojnë dot, dihet ajo”, shprehet një prej tyre.
Situata është e vështirë edhe për tregtarët, të cilët raportojnë një ulje të ndjeshme të blerjeve. Sipas tyre, kostot e prodhimit, shtrenjtimi i inputeve bujqësore dhe mungesa e mbështetjes po e përkeqësojnë më tej gjendjen.
Në tregun e Korçës, si konsumatorët ashtu edhe tregtarët përballen me probleme të mëdha. Pensionistët nuk arrijnë të përballojnë çmimet, ndërsa shitësit vuajnë nga rënia e kërkesës dhe shpenzimet e larta. Për familjet me të ardhura të pakta, shporta e përditshme po rëndohet gjithnjë e më shumë.
