Mijëra kanaçe birrë bllokojnë autostradën në SHBA pas përplasjes së kamionit

Një autostradë në Florida u bllokua të mërkurën nga mijëra kanaçe birre pas një përplasjeje të kamionit gjysmërimorkio që i transportonte.

Sipas BBC, të gjitha korsitë u mbyllën pasi gjysmërimorkio që mbante birrën u përplas me kamionët e parkuar në anë të rrugës. Autostrada përfundimisht u rihap disa orë më vonë.

Fotot e marra në vendngjarje nga Patrulla e Autostradës në Florida tregojnë aq shumë kuti dhe kanaçe birre të derdhura, saqë rruga mezi shihet.

Sipas Tampa Bay Times, dy gjysmërimorkio u përplasën në autostradën e ngarkuar të mërkurën në mëngjes dhe u përmbysën. Dy gjysmërimorkio të tjera u tërhoqën për të ndihmuar, si dhe një kamionçinë.

Një gjysmërimorkio e pestë, ajo që mbante birrën, nuk ndaloi në kohë dhe u përplas me automjetet e parkuara. Përveç birrës, në të gjithë rrugën është derdhur edhe betoni i transportuar nga një nga kamionët.

Shtuar 22.09.2022 11:45