Meta i bindet urdhërit të ekspertëve, vendos maskën dhe u bën thirrje shqiptarëve: Vaksinohuni!

Presidenti i republikës, Ilir Meta ka reaguar pas vendimeve të marra nga Komiteti Teknik i Ekspertëve.

Ai ka thënë se është dakord me masat shtesë të ndërmarra prej qeverisë, pasi sipas tij vetë shtimi i rasteve t’a imponon diçka të tillë.

Por Meta shprehet kundër orës policore, pasi sipas tij kjo situatë e vështirë nuk mund të mbahet me orë policore, por me masa të mirëfillta duke filluar që nga vaksinimi i popullatës, testimet e shtuara dhe gjurmimi më i mirë i rasteve.

Fotografia që ai ka vendosur krah postimit, shpreh dakordësinë për masat e reja anti-covid.

Statusi i plotë i Metës:

 Shtimi tepër i lartë i rasteve të infektimeve me COVID-19, fatkeqësisht dhe të humbjeve të jetëve në ditët e fundit, veçanërisht në rrethanat e reja të krijuara me përhapjen e variantin “Delta”, shtrojnë nevojën jetike për marrjen e masave të tjera efektive për të mos lejuar përshkallëzimin e mëtejshëm të situatës.

Ky moment shumë serioz nuk mund të mbahet nën kontroll me orë policore, por me masa shkencore dhe proporcionale, vaksinim shtesë dhe protokolle shëndetësore të konsoliduara dhe të njohura ndërkombëtarisht.

Testimi, gjurmimi, izolimi dhe trajtimi i duhur mjekësor janë hapa jetike në këtë situatë.

Inkurajoj qytetarët, veçanërisht ata me probleme të tjera shëndetësore dhe që nuk e kanë kaluar COVID-19, të vaksinohen sa më parë për të reduktuar mundësinë e përhapjes së virusit të rrezikshëm.

Mbajtja e maskave, respektimi i distancimit fizik dhe higjiena maksimale janë të domosdoshme gjithashtu.

I bëj apel Qeverisë të shtojë sa më parë fondet për sistemin shëndetësor, për të përmirësuar shërbimin e ofruar ndaj qytetarëve dhe për të mos u gjendur sërish para gjendjeve të papranueshme të mjekëve dhe infermierëve në qendra shëndetësore, që luftonin në vijën e parë, pa pajisje mbrojtëse dhe mjetet e duhura diagnostike./ albeu.com


Shtuar 30.08.2021 14:42