Për të tretën ditë radhazi, protestat kundër qeverisë në Shqipëri janë mbyllur me përplasje të dhunshme. Pakënaqësia e studentëve dhe qytetarëve ndaj qeverisë së kryeministrit Edi Rama është pasqyruar edhe në një artikull të gazetares Kathleen Heylen për median belge VRT NWS.
Sipas VRT NWS, lëvizja studentore nisi mes shqetësimeve për cilësinë e arsimit, shpenzimet e larta të studimeve dhe mundësitë e pakta për punësim. Më pas, ajo mori përmasa më të gjera si protestë kundër qeverisë, korrupsionit dhe pabarazisë që demonstruesit thonë se shohin në vend.
Të lidhura
None found
Protestuesit kërkojnë ndryshime në arsim, luftë ndaj korrupsionit dhe dorëheqjen e Edi Ramës. Kërkesa për largimin e kryeministrit është ngritur prej muajsh edhe nga opozita qytetare përmes protestave.
Në Tiranë dhe qytete të tjera, demonstratat janë shoqëruar me përplasje me policinë. Media belge shkruan se protestuesit kanë goditur godinat shtetërore me gurë e fishekzjarrë, kanë bllokuar rrugë dhe u kanë vënë zjarrin kazanëve të mbeturinave. Policia ka përdorur gaz lotsjellës, granata verbuese dhe topa uji.
Artikulli sjell dëshmi studentësh dhe qytetarësh për pakënaqësinë me kushtet e jetesës, perspektivat e punësimit dhe mënyrën si funksionojnë institucionet publike. Organizatorët thonë se do ta vazhdojnë mobilizimin, pavarësisht përplasjeve me policinë dhe reagimit të autoriteteve.
Zemërimit publik i është shtuar edhe projekti për një kompleks turistik luksoz në bregdetin jugor të Shqipërisë, i lidhur me kompaninë e investimeve të Jared Kushner, dhëndrit të presidentit amerikan Donald Trump.
Duke iu referuar Reuters, artikulli përmend dyshimet lidhur me dokumentet e pronësisë për një pjesë të tokës ku parashikohet projekti. Reuters, megjithatë, nuk gjeti prova se Kushner kishte kryer shkelje; ai nuk është i përfshirë drejtpërdrejt në mosmarrëveshjen e pronësisë.
Edi Rama ka deklaruar se nuk do të japë dorëheqjen. Në qëndrime të cituara nga Reuters, kryeministri ka shprehur gatishmëri për të diskutuar kostot e arsimit, por ka mbrojtur mandatin qeverisës, të cilin e ka lidhur me synimin për anëtarësimin e Shqipërisë në Bashkimin Evropian.
Rama ka dënuar gjithashtu dhunën dhe dëmtimin e godinave, duke paralajmëruar se përgjegjësit do të japin llogari për veprimet e tyre. Ai është cituar të thotë se askush nuk mund ta mbajë Shqipërinë peng dhe se gabon kush mendon se mund të veprojë jashtë ligjit.
VRT NWS vëren se kërkesat fillestare për reforma arsimore janë zgjeruar në një sfidë politike për qeverinë. Mbetet e paqartë nëse mobilizimi i qytetarëve do të ndryshojë konkretisht qëndrimin e autoriteteve.
