Miratimi i fundit i Reformës Territoriale dhe protestat kundër qeverisë, kanë qenë në qendër të një reagimi të fortë të ish-deputetit Lefter Maliqi, i cili akuzoi mazhorancën për manovra në prapaskenë.
Sipas tij, ndryshimet administrative që parashikojnë shkrirjen e 15 bashkive dhe që janë miratuar nga mazhoranca, i shërbejnë interesit të kryeministrit Rama për të siguruar mbijetesën politike.
Të lidhura
None found
Maliqi pretendoi se këto ndërhyrje cenojnë rëndë shërbimet që marrin qytetarët në rrethe.
Në vlerësimin e ish-deputetit, Rama e ka ndërmarrë këtë hap për llogaritë e veta politike, duke menduar se edhe në rast dorëheqjeje, një hartë me 46 bashki do t’i mundësonte të mbijetonte politikisht dhe të siguronte në të ardhmen 68-69 deputetë.
Maliqi e cilësoi heqjen e komunave një goditje vrastare, ndërsa ndryshimet e tanishme i konsideroi edhe më të rënda, pasi i largojnë shërbimet nga qytetarët. Ai kujtoi se ka drejtuar komunën më të madhe në Berat dhe tha se sot aty kanë mbetur investimet e realizuara prej tij.
Duke iu referuar protestave të përditshme, Maliqi tha se rrëzimi i asaj që ai e quan “narkoshtet” përbën qëllimin kryesor dhe legjitim të qytetarëve.
Megjithatë, ai ngriti pretendimin se mes protestuesve janë futur persona nga strukturat shtetërore dhe Partia Socialiste, me synimin për të shkaktuar përçarje.
Ish-deputeti deklaroi se një grup i infiltruar lëshon edhe thirrje kundër Berishës. Duke përmendur shumë persona të PD-së dhe pjesëmarrjen e tij në protesta të paktën mbi 30 herë, ai këmbënguli se mes të pranishmëve ka njerëz të futur, përfshirë tashmë edhe persona të PS-së dhe civilë të SHIK-ut.
Sipas Maliqit, protestuesit kanë një kërkesë të vetme: rrëzimin e “narkoshtetit” dhe të kësaj qeverie.
Në përfundim të deklaratës, Maliqi i kërkoi opozitës të përshpejtojë organizimin elektoral dhe të dalë në terren me kandidatë të bashkuar, duke i bërë thirrje PD-së t’i shpallë kandidatët sa më shpejt.
