Deputetja e Partisë Demokratike, Ledina Alolli, ka reaguar lidhur me gjetjet e Kontrollit të Lartë të Shtetit pas auditimit të Bashkisë Korçë, të kryer në tetor 2026.
Sipas saj, raporti paraqet një situatë shqetësuese në administrimin e financave, investimeve, prokurimeve dhe pasurisë publike nga bashkia e drejtuar prej Sotiraq Filos.
Të lidhura
None found
Alolli theksoi se në fund të vitit 2025 detyrimet tatimore të papaguara arrinin në 668 milionë lekë, duke u rritur me afro 36 milionë lekë brenda një viti.
Deputetja denoncoi gjithashtu faktin se gjatë vitit 2025 janë realizuar vetëm 49% e investimeve të planifikuara. Nga 418 milionë lekë të parashikuara, janë shpenzuar 203 milionë lekë, ndërsa më shumë se 214 milionë lekë investime kanë mbetur pa u kryer.
Shqetësime janë ngritur edhe për procedurat e prokurimit publik. Në 20 prej 36 procedurave të audituara për vitet 2023-2024, sipas KLSH-së, fitues janë shpallur operatorë ekonomikë që nuk përmbushnin të gjitha kriteret e përcaktuara në dokumentet e tenderit. Vlera e kontratave arrinte në rreth 662 milionë lekë pa TVSH.
Alolli tha se raporti i KLSH-së për Bashkinë Korçë përbën një alarm për mënyrën e përdorimit të parave dhe administrimit të pasurisë publike.
“Të nderuar qytetarë!
Në Bashkinë Korçë shfaqen dy pamje të ndryshme. Njëra është ajo e inaugurimeve, fotografive dhe premtimeve të Sotiraq Filos. Tjetra është panorama që del nga dokumentet e Kontrollit të Lartë të Shtetit.
Në versionin e parë, gjithçka paraqitet si një histori suksesi. Në të dytin, borxhet shtohen, investimet mbeten pas planit dhe rekomandimet nuk zbatohen plotësisht.
Propaganda mund të ndryshojë pamjen e një fotografie, por nuk mund të korrigjojë shifrat e një bilanci. Për këtë arsye, raporti i KLSH-së kërkon përgjigje dhe jo propagandë.
Raporti përfundimtar i auditimit, i muajit tetor 2026, ngre pikëpyetje serioze për përgjegjësinë dhe efikasitetin e drejtimit të Bashkisë Korçë.
Problemi i parë lidhet me 668 milionë lekë detyrime tatimore të pambledhura, të akumuluara deri në fund të vitit 2025. Brenda vetëm një viti, kjo shumë është rritur me afro 36 milionë lekë. Një administrim financiar nuk mund të konsiderohet i mirë kur detyrimet vazhdojnë të shtohen në vend që të ulen.
Situatën e rëndon edhe rivlerësimi i tarifave vendore, përfshirë tarifat e pastrimit dhe gjelbërimit, pa mbështetje në kritere ligjore. Qytetarë dhe biznese të vogla familjare të prekur nga këto rivlerësime kanë depozituar ankesa zyrtare pranë Bashkisë Korçë, por nuk kanë marrë përgjigje.
Mungesa e reagimit ndaj ankesave të qytetarëve nuk përbën administrim, por shpërfillje të detyrimit për të dhënë llogari.
Një tjetër tregues shqetësues është realizimi i vetëm 49% të investimeve të parashikuara për vitin 2025. Nga fondi prej 418 milionë lekësh, janë realizuar 203 milionë lekë, ndërsa mbi 214 milionë lekë investime kanë mbetur pa u zbatuar.
Kjo tregon dallimin e madh mes projekteve të miratuara dhe investimeve që marrin formë konkrete për qytetarët e Korçës.
Probleme janë konstatuar edhe në tenderët publikë dhe në mekanizmat e kontrollit të tyre. Në 20 nga 36 procedurat e prokurimit të audituara për vitet 2023-2024, KLSH ka gjetur se fitues janë shpallur operatorë që nuk plotësonin të gjitha kriteret e tenderave.
Kontratat e lidhura në këto procedura kishin një vlerë rreth 662 milionë lekë pa TVSH. Pavarësisht parregullsive të evidentuara në tenderat e viteve të mëparshme, prokurimet publike nuk u përfshinë në planin e auditimit të brendshëm gjatë vitit 2025.
Si rrjedhojë, nuk është garantuar një kontroll i brendshëm i planifikuar për këtë fushë. Gjetjet kërkojnë sqarime konkrete dhe përcaktim të përgjegjësive për mënyrën e administrimit të procedurave të financuara me paratë publike.
Raporti evidenton gjithashtu mangësi në administrimin e pasurisë publike. Sipas KLSH-së, 279 prona të certifikuara në emër të Bashkisë Korçë nuk janë regjistruar në pasqyrat financiare si aktive afatgjata materiale.
Janë konstatuar edhe pasaktësi në pasqyrimin e aktiveve me vlerë dhjetëra milionë lekë. Kjo ngre pikëpyetje për transparencën, pasi pasuria publike nuk paraqitet në mënyrë të plotë dhe të saktë në pasqyrat financiare.
Ndërkohë, nga kontratat dhe tarifat vendore rezultojnë edhe detyrime të tjera të paarkëtuara. KLSH ka evidentuar mbi 39 milionë lekë të papaguara nga kontratat për qiratë e tokës bujqësore dhe mbi 1.3 milionë lekë të ardhura të pambledhura nga vendparkimet e rezervuara.
Bëhet fjalë për të ardhura publike që bashkia duhet t’i arkëtojë, por që vijojnë të mbeten të pambledhura.
Panorama bëhet edhe më shqetësuese nga fakti se, prej 37 masave organizative të rekomanduara në auditimin e mëparshëm, 13 nuk janë zbatuar, ndërsa 8 të tjera vijojnë të jenë në proces.
Pra, problemet evidentohen dhe rekomandimet jepen, por zgjidhja e tyre nuk është kryer në kohë. Kjo tregon mungesë përgjegjshmërie në drejtimin e bashkisë.
Zoti Sotiraq Filo, mund të flisni për projekte, aktivitete dhe investime, por nuk mund të anashkaloni gjetjet e Kontrollit të Lartë të Shtetit. Qytetarët e Korçës kanë nevojë për përgjigje, jo për propagandë.
Përse është rritur borxhi tatimor? Përse është realizuar vetëm gjysma e investimeve të planifikuara?
Çfarë masash janë marrë për parregullsitë e gjetura në tenderat e viteve të mëparshme dhe për mangësitë e kontrollit gjatë vitit 2025?
Përse 279 prona të certifikuara nuk janë pasqyruar në regjistrat përkatës? Dhe përse një pjesë e rekomandimeve të KLSH-së vazhdojnë të mos zbatohen?
Si deputete e qarkut Korçë, kërkoj që drejtimi i bashkisë të bëjë publike masat e marra për secilën gjetje, përgjegjësitë administrative të përcaktuara dhe afatet konkrete për zbatimin e rekomandimeve.
Korça nuk mund të drejtohet përmes premtimeve, propagandës dhe heshtjes përballë problemeve.
Administrimi i parave publike kërkon transparencë, pasuria publike kërkon përgjegjësi dhe qytetarët meritojnë llogaridhënie.”
