Belind Këlliçi, nënkryetar i Partisë Demokratike, ka ngritur akuza të forta ndaj organeve të drejtësisë së re, duke theksuar se ato kanë dështuar në përballjen me korrupsionin. Ai vuri në dukje se qytetarët shqiptarë kanë derdhur pothuajse 500 milionë dollarë për vënien në punë të këtyre institucioneve, por sipas tij, skandalet më të rënda të korrupsionit nuk kanë përfunduar kurrë në një hetim të plotë.
Në një komunikim me shtypin, deputeti demokrat pohoi se maxhoranca e ndërpreu seancën e fundit parlamentare pikërisht për të bllokuar opozitën që të sillte në debat si Reformën Territoriale, ashtu edhe pasqyrën e punës së organeve të drejtësisë.
Të lidhura
None found
Sipas Këlliçit, tani që kanë kaluar gati shtatë vjet nga nisja e veprimtarisë së SPAK-ut, ka ardhur momenti të bëhet një bilanc i arritjeve të kësaj strukture.
Pjesën më të madhe të fjalës së tij, ai ia kushtoi dosjes së inceneratorëve, duke pretenduar se hetimet janë zvarritur me vite dhe për pasojë edhe dëmi financiar është thelluar. Këlliçi deklaroi se për Inceneratorin e Tiranës, vetë Prokuroria e Posaçme ka vërtetuar se nga marrëveshja janë arkëtuar 110 milionë euro, teksa investimet konkrete nuk kanë shkuar përtej 21 milionë eurove.
Ligjvënësi demokrat nguli këmbë se një shumë prej 89 milionë eurosh mungon dhe se deri më tani nuk është bllokuar asnjë vlerë monetare. Ai gjithashtu vuri në dyshim mungesën e hetimit të disa dokumenteve dhe kontratave të caktuara.
Këlliçi e nisi deklaratën e tij të detajuar duke iu drejtuar publikut, duke theksuar se seanca e fundit e Kuvendit rikonfirmoi se maxhoranca synon t’i heqë opozitës të drejtën e fjalës, veçanërisht sa i përket transparencës mbi punimet e Komisionit të Reformës Territoriale, të cilën ai e cilësoi si tentativën e radhës të Edi Ramës për të manipuluar zgjedhjet vendore të ardhshme.
Ai siguroi se PD do të angazhohet për transparencë dhe do të bashkëpunojë me partnerët ndërkombëtarë për të penguar këtë skenar, duke kujtuar paralajmërimin e eurodeputetit Tomas Zdechovsky se prekja e zgjedhjeve do të çonte Ramën prapa hekurave.
Sipas Këlliçit, ndërprerja e punimeve të Kuvendit kishte gjithashtu si qëllim kryesor të mos lejonte opozitën të ndriçonte punën e institucioneve të quajtura të “Drejtësisë së Re”, të cilat ai i konsideron si zgjatim të pushtetit ekzekutiv.
Në vijim, ai zbërtheu me shifra koston e lartë të këtij sistemi: nga viti 2019, taksapaguesit kanë financuar me afro gjysmë miliardë dollarë organet e drejtësisë, përfshirë Prokurorinë, Gjykatat, ILD-në, KLP-në, KLGJ-në, KPA-në, KPK-në dhe SPAK-un.
Ai shtroi pyetjen nëse vendi ka sot drejtësi të pavarur, duke përshkruar një tablo ku qytetarët presin minimalisht 15 vjet për një vendim, frustrimi arrin deri në viktima në sallat e gjyqeve dhe vrasjen e gjyqtarëve, ndërsa korrupsioni thellohet çdo vit dhe institucionet e ngritura me aq zhurmë mbeten spektatore.
Ai sqaroi se nuk bën pjesë tek politikanët që dënojnë drejtësinë, përkundrazi, ka ndihmuar me kallëzime dhe prova që ata të bëjnë punën e tyre, por pas gati 7 vitesh të operimit të SPAK-ut, ka ardhur momenti të shihet bilanci.
Duke marrë si shembull fillestar dosjen e inceneratorëve, Këlliçi rikujtoi se hetimet filluan në vitin 2020 dhe se inceneratorët e Fierit e Elbasanit u mbyllën pa kthyer asnjë qindarkë në buxhet, duke lënë vetëm dy karakatina të ndryshkura për të cilat shtetasit ende paguajnë, ndërkohë që mbi 40 milionë euro u grabitën.
Pika më skandaloze, tha ai, është Inceneratori i Tiranës, hetimi i të cilit përfundoi në korrik, pas plot 6 vitesh. SPAK-u pohon se deri në sekuestrimin e kompanisë në 2023-shin, nga kontrata janë marrë 110 milionë euro, por investimet reale ishin vetëm 21 milionë euro, pra mungojnë 89 milionë euro dhe nuk është sekuestruar asnjë monedhë, teksa hetimi vijonte dhe paratë zhdukeshin.
Ai tërhoqi vëmendjen dhe mbi një dokument me firmën e Kryeministrit Rama për bonusin 8% të dhënë kësaj kompanie fantazmë, i cili sipas tij nuk u hetua kurrë, duke e ndalur kështu përgjegjësinë vetëm tek Alqi Bllako e Lefter Koka, ndërsa firma politike mbeti e paprekshme.
Më pas, Këlliçi përmendi një kontratë me kompaninë LLANAJ shpk për 500 metra katrorë ndërtim, me vlerë të paktën 1 milionë euro, e cila gjithashtu nuk u bllokua. Ai përmendi edhe një hua prej 280 mijë eurosh që Klodian Zoto i jepte kompanisë WSI shpk, që lidhet me tregun e lojërave të fatit përmes ADRIA ENTERTAINMENT dhe që ende figuron në bilancet e saj, pa u hetuar kjo marrëdhënie financiare apo sekuestruar shuma.
Duke kaluar tek Eco Park Durrës, ai tregoi se pas gjashtë vitesh hetimi, PD ka depozituar një kallëzim të plotë, por 19 milionë euro janë zhdukur përmes një firme fiktive në emër të shoferit të Mirel Mërtirit, me kompaninë ARCON shpk.
Për të ilustruar atë që SPAK-u e quan “korrupsion intelektual”, Këlliçi u ndal te një dokument i 1 prillit 2019, një kontratë mes kompanisë së Inceneratorit të Tiranës, IEBV dhe studios së arkitekturës Casanova Hernandez për 225 mijë euro nga buxheti i shtetit për një projekt për Eco Park, përpara se qeveria të kishte shpallur ndonjë gjë.
Ai rindërtoi kronologjinë: tenderi u hap në tetor 2019, më pas ra tërmeti i nëntorit, Rama shpalli gjendjen e fatkeqësisë natyrore për të krijuar mundësinë e vjedhjes, ministrja Anila Denaj anulloi tenderin me pretekstin e rindërtimit, por vetëm dy javë më vonë, më 16 dhjetor, me vendim të firmosur nga Rama, Komiteti Ndërministror i Emergjencave Civile vendosi që projekti të bëhej me procedurë të përshpejtuar pa tender, pikërisht duke përdorur emergjencën si justifikim.
Këto fakte, theksoi ai, do të mjaftonin që Edi Rama dhe organizata e tij kriminale të përballeshin me drejtësinë.
Lidhur me aferën e sterilizimit, Këlliçi raportoi se pas pesë vitesh hetim, bilanci është rreth 100 milionë euro dëm, disa prestanomë dhe vetëm 3 vite burg, ndërsa paratë janë zhdukur. Ai vuri re se skenari përsëritet thuajse matematikisht: SPAK-u heton, por paratë avullohen.
Po ashtu, për Check Up, hetimi zgjat prej 5 vitesh pa asnjë rezultat, ndonëse Komisioni Hetimor i opozitës dokumentoi edhe skemën e faturave fiktive. “Provat janë mbi tavolinë, ajo që mungon është rezultati,” tha ai, duke kujtuar edhe gjendjen e spitaleve, ku onkologjiku ngjan me një kamp përqendrimi lufte.
Në mënyrë të ngjashme, ai përmendi grabitjen e tokës bujqësore dhe pronës publike, për të cilën PD ka depozituar një kallëzim të plotë, por hetimet vazhdojnë pafundësisht ndërsa tokat e fermerëve zhduken në projektet private.
Ai shtoi se e njëjta gjë ndodh edhe me dosjet e tigrave, të rrugëve që marrin jetë njerëzish dhe të parqeve fotovoltaike, ku hetimi bëhet “me majme”, por lekët zhduken gjatë procesit.
Në fund, Këlliçi konkludoi se pas një fature prej gjysmë miliardë dollarësh, shqiptarët kanë të drejtë të dinë se çfarë kanë financuar. Bilanci është i pamëshirshëm: dosjet plaken, buxhetet rriten, përgjegjësit mbrohen, korrupsioni lulëzon dhe paratë nuk kthehen kurrë, ndërsa organizata kriminale vijon e pashqetësuar. Ai u shpreh se nuk do të ketë heshtje dhe se kjo betejë synon t’u rikthejë qytetarëve besimin se ligji është më i fortë se pushteti, duke paralajmëruar se sa më gjatë të vonohet drejtësia, aq më e rëndë do të jetë fatura, të cilën kësaj radhe nuk do ta paguajnë më shqiptarët.
