Nënkryetari i Partisë Demokratike, Belind Këlliçi, ka reaguar pas fjalimit të deputetes Elisa Spiropali në seancën e fundit parlamentare, ku ajo ngriti akuza të rënda ndaj ish-zëvendëskryeministres Belinda Balluku.
Këlliçi pretendon se qëndrimi i Spiropalit dëshmon publikisht për ekzistencën e grupeve rivale brenda Partisë Socialiste, si dhe për përdorimin e strukturave kriminale për ruajtjen e pushtetit.
Të lidhura
None found
Sipas tij, Spiropali ka denoncuar presione dhe shantazhe të ushtruara nga persona ose grupe brenda mazhorancës, duke iu referuar në mënyrë të tërthortë Belinda Ballukut. Ai shton se deputetja ka lënë të kuptohet se ish-zëvendëskryeministrja ka përdorur lidhje me krimin e organizuar kundër kundërshtarëve gjatë zgjedhjeve të vitit 2025 dhe se Balluku duhet të jetë në burg.
Nënkryetari i PD-së e interpreton këtë përplasje si shenjë të dobësimit të mazhorancës dhe të degradimit të pushtetit. Ai përmend edhe goditjet e mëparshme politike e gjyqësore ndaj figurave si Erion Veliaj, duke theksuar se lufta e brendshme tashmë ka dalë jashtë kontrollit.
Këlliçi shprehet se nuk është e qartë se çfarë e ka shtyrë Spiropalin të flasë kaq hapur, por sipas tij ashpërsia e konfliktit tregon se palët nuk po marrin më parasysh pasojat.
“Kur Elisa denoncon publikisht Belindën për presione dhe shantazh, bëhet fjalë për një zhvillim të rëndësishëm. Në seancën e fundit parlamentare, Elisa Spiropali pranoi se brenda shumicës qeverisëse veprojnë persona ose grupe që ushtrojnë presion, duke nënkuptuar Belinda Ballukun”, shkruan Këlliçi.
Ai vijon duke thënë se lufta për pushtet mes klaneve të Rilindjes është e njohur dhe se përplasja ka prodhuar viktima. Në këtë kuadër, ai përmend Veliajn, Gysin dhe Vlorën, të cilët, sipas tij, duhet t’i nënshtrohen drejtësisë për krimet e kryera, por nuk do të ndodheshin sot në atë situatë pa mbështetjen e Ramës ose të Ballukut.
Këlliçi e cilëson rast të paprecedent faktin që një deputete e shumicës flet kaq drejtpërdrejt dhe e sheh këtë si shenjë të një pushteti të konsumuar nga abuzimi, ku synimi kryesor është pasurimi dhe forcimi i grupeve kriminale.
“Kjo përplasje tregon kalbëzimin e këtij pushteti dhe rrënimin e tij total. Ngritja e zërit nga Elisa dhe mënyra konkrete me të cilën ajo i adresoi akuzat mund të vlerësohen”, shprehet ai.
Në përfundim, nënkryetari i PD-së i bën thirrje Spiropalit të bashkëpunojë me drejtësinë, nëse synon të japë një kontribut më të madh për shoqërinë, dhe të paraqesë faktet që, sipas tij, ajo di për shantazhin që Belinda Balluku u ka bërë kundërshtarëve politikë brenda dhe jashtë grupimit të saj.
