Një ngjarje e mundshme kriminale është parandaluar në Vaun e Dejës nga Policia e Shkodrës, e cila arrestoi një 38-vjeçar që po transportonte një minë me telekomandë. Ndërkohë, një person tjetër i dyshuar si bashkëpunëtor është shpallur në kërkim.
Aksioni, i koduar “Remote”, u realizua nga shërbimet e Komisariatit të Policisë së Vaut të Dejës, në bashkëpunim me Sektorin për Hetimin e Krimeve të Rënda të DVP Shkodër, pas informacioneve të marra në rrugë operative.
Të lidhura
None found
Sipas të dhënave të policisë, në orët e para të mëngjesit, në fshatin Stajkë, u ndalua për kontroll automjeti me të cilin po qarkullonte i dyshuari. Gjatë verifikimit, punonjësit e policisë zbuluan dhe sekuestruan një minë me telekomandë, të lidhur me një aparat celular dhe të përshtatur për shpërthim nga distanca.
Si provë materiale u sekuestruan edhe automjeti, një maskë, si dhe dy telefona celularë.
Pas përfundimit të veprimeve të para hetimore, u arrestua shtetasi Euglen Buraku, 38 vjeç, banues në Spitallë, Durrës. Po ashtu, në kërkim u shpall E. P., 34 vjeç, banues në Durrës, i dyshuar si bashkëpunëtor në këtë rast.
Nën drejtimin e Prokurorisë, hetimet po vazhdojnë për të sqaruar destinacionin dhe qëllimin e transportimit të lëndës plasëse, si edhe për të identifikuar persona të tjerë që mund të kenë lidhje me këtë ngjarje.
