Donald Trump duket se ende nuk e ka shuar irritimin ndaj Giorgia Melonit. Presidenti i SHBA-së e ka vënë përsëri në shënjestër kryeministren e Italisë me një postim në rrjetin social Truth Social, ku publikoi një foto të saj të shoqëruar me fjalët: “Nevojitet një urdhër mbrojtjeje.”
Të lidhura
None found
Ky reagim erdhi pak para samitit të NATO-s, i cili mbahet më 7 dhe 8 korrik në Ankara, dhe konsiderohet si kapitulli më i fundit i tensioneve mes Uashingtonit dhe Romës. Nuk është hera e parë që Trump sulmon Melonin. Pas samitit të G7 në Evian, ai kishte pretenduar se kryeministrja italiane i ishte lutur për të dalë në një foto bashkë. Meloni iu kundërpërgjigj me një video në rrjetet sociale, ku deklaroi: “As unë dhe as Italia nuk i lutemi askujt.”
Postimi më i fundit pritet të ndikojë edhe në klimën e samitit të NATO-s, ku drejtuesit e vendeve anëtare do të diskutojnë për të ardhmen e aleancës dhe për shtimin e shpenzimeve në mbrojtje. Prej javësh, qeveritë e vendeve anëtare kanë negociuar për të shmangur përplasjet lidhur me objektivin që çdo shtet të investojë 5% të Prodhimit të Brendshëm Bruto në sektorin e mbrojtjes.
Ministri italian i Mbrojtjes, Guido Crosetto, është shprehur optimist se samiti do të kalojë pa probleme madhore, duke nënvizuar se angazhimet e ndërmarra do të respektohen dhe se takimi pritet të jetë i shkurtër. Sidoqoftë, ai pranoi se Trump mbetet një element i paparashikueshëm.
Presidenti amerikan, i cili në Ankara pritet të zhvillojë edhe një takim me presidentin ukrainas Volodymyr Zelensky, i ka sulmuar vazhdimisht aleatët europianë për atë që ai e konsideron si mungesë kontributi në mbrojtje dhe siguri.
Në të njëjtën kohë, disa media ndërkombëtare, mes tyre edhe Politico, raportojnë se gjuha e Trump ndaj aleatëve evropianë synon të rrisë presionin për më shumë investime në mbrojtje, nga të cilat do të përfitonte edhe industria amerikane e armëve.
