Dan Driscoll, zyrtari më i lartë civil i Ushtrisë amerikane, ka dhënë dorëheqjen pas muajsh përplasjesh me Sekretarin e Mbrojtjes, Pete Hegseth, duke thelluar kaosin brenda Pentagonit.
Të lidhura
None found
Financial Times raportoi se Driscoll ia dorëzoi dorëheqjen Presidentit Donald Trump të hënën dhe pritet të largohet zyrtarisht nga detyra të mërkurën. Sipas një personi të informuar për qëndrimet e tij, Driscoll mendonte se ndërhyrjet e Hegseth po i shkaktonin Ushtrisë amerikane “dëm brezash”.
“Është një moment zbulues dhe mendoj se tregon se Pentagoni është në rrëmujë”, deklaroi Tom Wright, bashkëpunëtor i lartë në Institutin Brookings.
Një prej çështjeve që përkeqësoi marrëdhëniet mes dy zyrtarëve ishte largimi i gjeneralit Randy George nga posti i Shefit të Shtabit të Ushtrisë në prill.
Që nga nisja e mandatit të dytë të Trumpit, Hegseth ka shkarkuar ose ka shtyrë drejt largimit disa gjeneralë e admiralë, si pjesë e një ristrukturimi të gjerë të drejtimit ushtarak.
Pas largimit të Driscollit, Ushtria amerikane nuk ka më një drejtues civil të përhershëm dhe as një komandant të përhershëm. Për të dyja këto pozicione nevojitet konfirmimi i Senatit.
Kjo situatë krijon një boshllëk në një periudhë të ndjeshme. Ushtria luan rol kyç në mbrojtjen raketore përmes sistemeve Patriot dhe THAAD, ndërsa mijëra trupa amerikane vazhdojnë të qëndrojnë për periudha të gjata në Lindjen e Mesme.
Christopher Meger, ish-zyrtar i lartë i Pentagonit gjatë administratës Biden, tha se Driscoll ishte ndër të paktët zyrtarë të lartë civilë që kishin besimin e trupave dhe që “bënë një punë vërtet të kënaqshme”.
Përplasjet mes Hegseth dhe Driscollit shtriheshin edhe në fushën e teknologjisë ushtarake. Driscoll ishte një prej figurave kryesore në projektet për prodhimin e dronëve me kosto më të ulët, zhvillimin e mjeteve kundër dronëve dhe krijimin e sistemeve të reja të mbrojtjes nga raketat.
Një burim i njohur me pozicionin e Driscollit tha se ai besonte që Hegseth po pengonte modernizimin për arsye personale.
Gjatë drejtimit të Driscollit, një batalion këmbësorie ishte ngarkuar me zhvillimin dhe bashkërendimin e kapaciteteve të reja të dronëve. Më vonë, Hegseth urdhëroi shpërbërjen e kësaj njësie.
Driscoll ishte përmendur edhe si një kandidat i mundshëm për të zëvendësuar Hegseth, nëse Trump do të vendoste ta shkarkonte Sekretarin e Mbrojtjes.
Largimi i tij ka ngjallur reagime edhe te republikanët. Senatori Mike Rounds u shpreh se ishte “i zhgënjyer” nga dorëheqja e Driscollit.
“Ku është lidershipi? Kishim disa gjeneralë shumë të mirë që nuk janë më aty dhe të cilët i respektonim”, tha Rounds.
Hegseth ka caktuar gjeneral-lejtnant Christopher LaNeve si komandant në detyrë të Ushtrisë dhe po përpiqet ta emërojë atë në mënyrë të përhershme. Megjithatë, disa senatorë republikanë kanë lënë të kuptohet se konfirmimi mund të hasë vështirësi, për shkak të pakënaqësisë lidhur me mënyrën e shkarkimit të gjeneralit George.
Dorëheqja e Driscollit mund të vështirësojë gjithashtu përpjekjet e Pentagonit për të siguruar miratimin e një buxheti prej 1.5 trilionë dollarësh, si dhe fondeve shtesë për luftën me Iranin.
Presionet nuk janë të kufizuara te Ushtria. Marina amerikane po përballet njëkohësisht me vështirësi të mëdha operacionale dhe financiare. Operacionet, nga Karaibet deri në Iran, kanë shtuar angazhimin e anijeve luftarake dhe kanë pakësuar rezervat e raketave.
Sekretari i Marinës, John Phelan, u shkarkua në prill dhe në vend të tij Trump emëroi Hung Kao si sekretar në detyrë.
Senatorja demokrate Jeanne Shaheen i kërkoi drejtpërdrejt Hegseth të japë dorëheqjen, duke e lidhur këtë kërkesë me mënyrën e menaxhimit të operacioneve ushtarake në Lindjen e Mesme dhe në zona të tjera të botës.
Megjithë kritikat e ardhura nga Pentagoni dhe Kongresi, Donald Trump vijon ta mbështesë publikisht Pete Hegseth.
Kur u pyet nëse Hegseth mund të kandidojë për Shtëpinë e Bardhë në vitin 2028, Trump foli pozitivisht për të.
“Ai ka bërë një punë të shkëlqyer”, tha presidenti amerikan, duke shtuar se Hegseth tani është i fokusuar te Ushtria.
Senatori demokrat Elisha Slotkin e akuzoi Hegseth se vepron me një “audiencë prej një personi”, Donald Trumpin. Sipas Slotkin, çdo person që nuk pajtohet me sekretarin ose që e bën atë të duket i dobët, përfundon duke u larguar nga detyra.
Në deklaratën e dorëheqjes, Driscoll nuk e kritikoi publikisht Hegseth. Ai falënderoi administratën dhe tha se kishte pasur “privilegjin” të punonte për modernizimin e Ushtrisë. Driscoll shtoi se përparimi i arritur nuk do të ishte i mundur “pa mbështetjen e Sekretarit Hegseth”.
