Një incident i rëndë me armë zjarri tronditi qendrën e Minneapolis të mërkurën pasdite, duke lënë pas një person të vdekur dhe të paktën pesë të tjerë të plagosur.
Të lidhura
None found
Forcat e rendit konfirmuan për CNN se në mesin e të lënduarve ndodhen edhe dy punonjës policie, por deri tani nuk janë bërë të ditura hollësi shtesë për rrethanat e ngjarjes.
Qendra Mjekësore e Qarkut Hennepin njoftoi se pas të shtënave ka marrë gjashtë pacientë, njëri prej të cilëve nuk arriti t’u mbijetonte plagëve. Autoritetet u bënë thirrje banorëve të qëndrojnë larg zonës pranë adresës 15 East Grant Street, aty ku ndodhi sulmi.
Afërsisht në orën 17:45 me orën lokale, dhjetëra makina policie dhe efektivë mbërritën dhe izoluan zonën. Në skenë u vunë re gjithashtu njësi SWAT dhe ekipe emergjence. Prania e autoriteteve vazhdoi edhe rreth orës 18:30, teksa situata u cilësua si e qetë.
Zona e prekur përfshin një ndërtesë apartamentesh, Qendrën e Konventave të Minneapolis, disa hotele dhe një spital. Si masë paraprake, Universiteti i St. Thomas, kampusi i të cilit gjendet në afërsi, vendosi izolimin e godinës. Një zëdhënës i institucionit e përshkroi këtë si “një masë shtesë sigurie”.
Guvernatori i shtetit të Minnesota-s, Tim Walz, deklaroi se ekipi i tij për sigurinë publike po merret me situatën dhe se përfaqësues të shtetit janë të pranishëm në terren.
Në një mesazh të postuar më pas, Walz shprehu mirënjohjen e tij: “Falënderoj forcat e rendit që po veprojnë në mënyrë aktive për të mbrojtur bashkëqytetarët tanë në qendër të Minneapolis këtë pasdite. Minnesota lutet për punonjësit tanë”.
