Aktiviteti i vullkanit Anak Krakatau ka ndërprerë transportin ajror në Indonezi, duke lënë rreth 270 mijë udhëtarë të bllokuar dhe duke shkaktuar anulimin e më shumë se 2 mijë fluturimeve.
Të lidhura
None found
Shpërthimet nisën të premten në mbrëmje në vullkanin që ndodhet në Ngushticën Sunda, rreth 150 kilometra larg Xhakartës. Gjatë fundjavës, aktiviteti vijoi dhe sasi të konsiderueshme hiri u përhapën në atmosferë.
Pasi hiri u evidentua në hapësirën ajrore pranë tyre, Aeroporti Ndërkombëtar Soekarno-Hatta në Xhakartë dhe tre aeroporte të tjera vendosën të zgjasin pezullimin e fluturimeve deri në orën 18:00 të së hënës.
Situata ka sjellë pritje të gjata në aeroportet e prekura. Pasagjerët kanë kërkuar kthimin e parave, si edhe sqarime lidhur me statusin e fluturimeve të planifikuara.
Autoritetet meteorologjike të Indonezisë bëjnë të ditur se reja e hirit është ngritur deri në 6 mijë metra mbi Java, ndërsa mbi Sumatra dhe provincën Banten ka arritur rreth 15 mijë metra. Sipas tyre, rreziku për shpërthime të tjera mbetet i lartë.
Ministri i Transportit, Dudy Purwagandhi, deklaroi se ende nuk dihet se kur do të stabilizohet situata, pasi kushtet atmosferike ndryshojnë.
Rreth kraterit aktiv është vendosur një perimetër ndalimi prej 3 kilometrash, ndërsa anijeve u është ndaluar hyrja në këtë pjesë të Ngushticës Sunda. Autoritetet kanë bërë të ditur gjithashtu se aktiviteti i fundit vullkanik nuk ka shkaktuar asnjë paralajmërim për cunami.
Emri Anak Krakatau, që përkthehet “Fëmija i Krakatoas”, lidhet me formimin e vullkanit në kalderën e krijuar pas shpërthimit të Krakatoas në vitin 1883.
Në dhjetor të vitit 2018, shembja e një pjese të Anak Krakatau shkaktoi cunami në brigjet e Sumatrës dhe Javas. Tragjedia la pas më shumë se 400 të vdekur, ndërsa mijëra persona u plagosën ose u detyruan të zhvendoseshin.
Indonezia shtrihet në të ashtuquajturën Unaza e Zjarrit e Paqësorit, rajon i njohur për aktivitetin e dendur sizmik dhe vullkanik.
