Të martën, Shtetet e Bashkuara ndërmorën sulme të reja kundër Iranit dhe rikthyen sanksionet për shitjet e naftës iraniane, si reagim ndaj një serie sulmesh mbi anije tregtare pranë Ngushticës së Hormuzit.
Të lidhura
None found
Komanda Qendrore e SHBA-së (CENTCOM) bëri të ditur përmes një deklarate të publikuar në platformën X se forcat amerikane kanë “nisur një seri goditjesh të fuqishme ndaj Iranit për t’i imponuar kosto të rënda për shënjestrimin dhe sulmet ndaj anijeve tregtare me ekuipazhe civile në një rrugë ujore ndërkombëtare.”
Në të njëjtën deklaratë thuhet se “Goditjet amerikane janë përgjigje ndaj sulmeve iraniane ndaj tre anijeve tregtare që po kalonin nëpër Ngushticën e Hormuzit. Agresioni i treguar nga Irani ishte i pajustifikuar, i rrezikshëm dhe një shkelje e qartë e armëpushimit”.
Kjo deklaratë u publikua menjëherë pas vendimit të SHBA për të rivendosur sanksionet ekonomike ndaj Iranit. Masa të tilla konsiderohen ndër sfidat më të rënda për armëpushimin e brishtë mes dy vendeve. Me rikthimin e sanksioneve, Uashingtoni tërheq një nga lëshimet kryesore që i kishte bërë Teheranit në këmbim të rihapjes së lundrimit në Ngushticën e Hormuzit.
“Irani do të përfitojë vetëm nëse tregon sjellje të përgjegjshme”, tha një zyrtar amerikan. Ai shtoi gjithashtu: “Veprimet e Iranit në Ngushticën e Hormuzit ishin plotësisht të papranueshme për Shtetet e Bashkuara dhe do të kenë pasoja.”
Zhvillimet patën efekt të menjëhershëm në tregjet botërore të naftës. Nafta Brent shënoi rritje me 3%, duke shkuar në 76 dollarë për fuçi, ndërsa nafta amerikane u ngjit me afro 6%, duke kaluar sërish mbi 70 dollarë për fuçi për herë të parë që nga 30 qershori.
Më herët, Departamenti Amerikan i Thesarit kishte pranuar të pezullonte për 60 ditë sanksionet ndaj shitjes së naftës iraniane, në kuadër të marrëveshjes së armëpushimit. Sekretari i Thesarit, Scott Bessent, e kishte përshkruar atë hap si një shenjë besimi te “bisedimet konstruktive” mes dy vendeve.
