Arabia Saudite është vënë sërish në shënjestër të një sulmi nga rebelët Houthi të Jemenit. Koalicioni ushtarak i udhëhequr nga Riadi bëri të ditur se kishte interceptuar dy dronë që fluturonin në drejtim të kryeqytetit, si dhe dy raketa balistike të drejtuara kundër qytetit jugor Khamis Mushait.
Të lidhura
None found
Zhvillimi vjen në një periudhë tensionesh të vazhdueshme në rajon, ndërsa përplasja mes Houthive, të lidhur me Iranin, dhe forcave që mbështesin qeverinë e Jemenit të njohur ndërkombëtarisht vijon të përshkallëzohet.
Koloneli saudit Turki al-Malki, zëdhënës i koalicionit, deklaroi se sistemet e mbrojtjes ajrore identifikuan dhe shkatërruan dy dronët e nisur drejt zonës së Riadit.
Al-Malki e publikoi njoftimin në Platformën X, ku sulmuesit i cilësoi si “organizata terroriste Houthi”.
Më vonë, zëdhënësi njoftoi edhe për kapjen e dy raketave balistike të lëshuara drejt Khamis Mushait, qytet në jugperëndim të Arabisë Saudite, ku ndodhet një bazë e rëndësishme e forcave ajrore të mbretërisë.
