Marrëdhëniet mes Shteteve të Bashkuara dhe Iranit vijojnë të jenë të tensionuara, ndërsa situata në Lindjen e Mesme mbetet e ndezur.
Të lidhura
None found
Nga Teherani është kërkuar që të njihet ajo që autoritetet iraniane e përshkruajnë si “rendi i ri iranian” në Ngushticën e Hormuzit. Në të njëjtën kohë, shefi i Pentagonit, Pete Hegseth, ka anuluar udhëtimin e planifikuar drejt Izraelit.
Kryetari i Parlamentit iranian, Mohammad Bagher Ghalibaf, ka akuzuar SHBA-në për shkelje të armëpushimit në disa forma, duke përfshirë edhe atë që ai e cilësoi si “shkelje të rregullave të reja iraniane” në Ngushticën e Hormuzit.
Më tej, deputeti i lartë iranian Ebrahim Azizi u shpreh se “nuk ka alternativë tjetër” veçse të pranohet “rendi i ri iranian” në këtë kalim detar me rëndësi strategjike, nëpër të cilin kalon një pjesë e konsiderueshme e tregtisë globale të naftës.
Çështja e sigurisë në Ngushticën e Hormuzit vazhdon të jetë ndër pikat më të diskutueshme në bisedimet mes Uashingtonit dhe Teheranit. SHBA-ja dhe Irani mbajnë qëndrime të ndryshme sa i takon kontrollit dhe rregullave të lundrimit në këtë zonë.
Në bazë të memorandumit të mirëkuptimit të arritur më 17 qershor, Irani kishte marrë përsipër të siguronte kalimin e anijeve tregtare për 60 ditë pa tarifa shtesë. Megjithatë, autoritetet iraniane kanë kërkuar që çdo mjet lundrues të bashkërendojë kalimin me Teheranin dhe kanë paralajmëruar se përdorimi i korridoreve detare të përcaktuara nga Organizata Ndërkombëtare Detare (IMO), pa miratimin e Iranit, është “i papranueshëm dhe plotësisht i rrezikshëm”.
Në një zhvillim paralel, BBC raportoi se sekretari amerikan i Mbrojtjes, Pete Hegseth, ka anuluar vizitën që pritej të zhvillonte në Izrael.
Hegseth ishte në Turqi për samitin e NATO-s së bashku me presidentin Donald Trump, ndërsa udhëtimi për në Izrael nuk ishte bërë zyrtar as nga njëra palë dhe as nga tjetra.
Sipas mediave ndërkombëtare, në këtë takim parashikohej të diskutohej shqetësimi i Izraelit për mundësinë e një shitjeje të avionëve luftarakë F-35 për Turqinë. Kryeministri izraelit Benjamin Netanyahu kishte deklaruar më herët se një marrëveshje e tillë do të ishte një gabim.
Deri në këtë moment, as Uashingtoni dhe as Tel Avivi nuk kanë ofruar një sqarim zyrtar për arsyen e anulimit të vizitës.
