Për herë të parë, mediat shtetërore iraniane kanë bërë publike pamje nga brendësia e kompleksit të Ajatollah Ali Khameneit, ku duken dëmet e rënda të lëna pas nga sulmi ajror amerikano-izraelit i muajit mars.
Videoja, me kohëzgjatje rreth 50 sekonda, paraqet grumbuj mbetjesh, tavane të rrëzuara, trarë mbajtës të përkulur dhe dyer të shkatërruara nga forca e shpërthimit.
Të lidhura
None found
Sipas raportimeve, goditjet më të mëdha janë konstatuar në Imam Khomeini Husseiniya, sallën e kompleksit ku mbaheshin takime zyrtare, ceremoni fetare dhe fjalime publike të udhëheqësit suprem.
Në pamje shihen hapësira të mbuluara nga pluhuri dhe mbeturinat, ndërsa pjesë të mëdha të godinës duket se kanë pësuar dëmtime serioze.
Deri tani, gjendja e kompleksit ishte pasqyruar vetëm përmes imazheve satelitore, pa pasur publikime nga brenda objektit.
Publikimi i videos vjen në kohën kur në Iran po vijojnë ditët e zisë për Ajatollah Ali Khamenein. Në disa qytete të vendit janë zhvilluar tubime dhe procesione, ndërsa mijëra besimtarë morën pjesë në ceremonitë përkujtimore edhe në qytetet e shenjta shiite të Naxhafit dhe Qerbelasë në Irak, përpara mbajtjes së ceremonive të varrimit në Iran.
Në disa nga këto ceremoni u raportuan edhe çaste tensioni, pasi pjesëmarrësit tentuan t’i afroheshin arkivolit, duke detyruar organizatorët të ndërhynin për të parandaluar incidente.
