Elina Shiraz, gazetare e Daily Mail, ka ndarë detaje mbi largimin e Kimberly Guilfoyle nga detyra e ambasadores së SHBA-së në Greqi. Sipas saj, Guilfoyle ishte e informuar se po përgatitej fundi i mandatit të saj.
Shiraz tha se ambasadorja e kishte kuptuar këtë që kur sekretari amerikan i Shtetit, Marco Rubio, vizitoi Athinën disa ditë më parë.
Të lidhura
None found
“Ajo e përqafoi, dukej e fuqishme dhe e sigurt, por burime nga prapaskenat më thanë se e dinte që do të largohej”, u shpreh gazetarja në një intervistë për televizionin ERT. Ajo shtoi se vendimi u mor brenda dy ditësh.
Gazetarja tha se kishte marrë shumë ankesa dhe materiale, mes tyre mesazhe dhe regjistrime audio, nga persona në Greqi dhe në SHBA. Sipas saj, informacionet tregonin se pakënaqësi kishte edhe në qarqet diplomatike.
Shiraz sqaroi se pyetja që i bëri zëdhënëses së Shtëpisë së Bardhë, Katie Zacharia, nuk synonte të nxirrte një njoftim të menjëhershëm për largimin e Guilfoyle. Ajo donte të kuptonte nëse administrata amerikane planifikonte të vepronte lidhur me akuzat e publikuara.
Më pas, gazetarja ia parashtroi të njëjtën pyetje edhe presidentit Donald Trump, i cili, sipas saj, u përpoq të mos e trajtonte çështjen.
Largimi i Guilfoyle ndodhi pas raportimeve në media për sjelljen e saj dhe lidhjet me biznesmenë grekë. Artikujt kanë ngritur shqetësime edhe mbi përdorimin e avionëve privatë për udhëtime dhe pjesëmarrjen në aktivitete shoqërore, për të cilat dyshohet se shpenzimet paguheshin nga biznesmenë.
Guilfoyle dhe avokatët e saj i kanë hedhur poshtë akuzat. Ata kanë thënë se ajo i kishte njoftuar aktivitetet e saj pranë Departamentit amerikan të Shtetit dhe se kishte respektuar rregullat në fuqi.
Raportimet bëjnë të ditur se Departamenti i Shtetit po shqyrton çështjen, por ende nuk është e qartë nëse kjo procedurë do të kthehet në një hetim zyrtar nga Inspektori i Përgjithshëm.
Një nga çështjet që mbetet për t’u zgjidhur pas largimit të saj është emërimi i pasardhësit. Deri atëherë, përgjegjësitë në ambasadën amerikane në Athinë do t’i ushtrojë i ngarkuari me punë, Joshua Haque.
Megjithatë, Elina Shiraz mendon se largimi i Guilfoyle nuk do të ketë ndikim në marrëdhëniet mes Greqisë dhe SHBA-së.
