Një kompleks i rëndësishëm i NASA-s në periferi të Madridit është përfshirë nga vala e zjarreve që ka kapluar zonat rreth kryeqytetit spanjoll.
Agjencia hapësinore amerikane njoftoi përmes një përfaqësuesi se flakët përshkuan terrenin e Kompleksit të Komunikimeve Hapësinore të Madridit (MDSCC), një nyje jetike për mbajtjen e lidhjeve me misionet që udhëtojnë në thellësitë e kozmosit.
Të lidhura
None found
Stafi u largua me kohë nga instalimet, bëri të ditur zëdhënësja, duke shtuar se një inspektim për të konstatuar dëmet e mundshme do të nisë sapo situata të jetë mjaftueshëm e sigurt.
I pajisur me antena gjigante, ky stacion në Spanjë është një nga tre shtyllat që formojnë Rrjetin e Hapësirës së Thellë (DSN). Dy të tjerët janë të vendosur në Kaliforni të Shteteve të Bashkuara dhe në Kanberra të Australisë.
Sipas shpjegimeve të NASA-s, kjo shpërndarje gjeografike siguron që, teksa planeti ynë kryen lëvizjen e tij rrotulluese, të ketë përherë të paktën një grup antenash në linjë të drejtpërdrejtë me sondat kozmike, duke mundësuar një komunikim të pandërprerë me misionet në hapësirën e largët.
