Një plan evakuimi me përmasa të papara është vënë në lëvizje nga autoritetet franceze në gadishullin Cap Ferret, në jugperëndim të vendit, teksa flakët vijojnë të përhapen me shpejtësi në rajon.
Të lidhura
None found
Sipas të dhënave zyrtare, zjarret kanë përfshirë tashmë më shumë se 125 mijë hektarë tokë, një zonë që tejkalon sipërfaqen e kryeqytetit Paris. Vetëm në dy ditët e fundit, rreth 44 mijë banorë dhe pushues janë detyruar të braktisin zonat e rrezikuara.
Sophie Brocas, guvernatorja e rajonit Gironde, njoftoi se procesi i evakuimit po zhvillohet në mënyrë të koordinuar. Ajo shtoi se qytetarët u paralajmëruan nëpërmjet mesazheve të urgjencës të dërguara drejtpërdrejt në celularët e tyre, me kërkesën që të largoheshin pa vonesë nga zonat e kërcënuara.
Për të parandaluar mbingarkesën e trafikut, njoftimet u shpërndanë në mënyrë të segmentuar, duke mbuluar fshatra dhe sektorë të ndryshëm me radhë. Banorëve iu dha udhëzimi që të përdornin rrugën provinciale D106, e cila përbën të vetmin dalje tokësore nga gadishulli.
Ata që nuk zotëronin automjete u evakuuan përmes rrugës detare. Bashkia e Arcachon raportoi se deri tani më shumë se 800 persona janë transportuar me anije nga Cap Ferret, ndërkohë që qindra të tjerë kanë mbërritur në port me valixhet e tyre.
David Laforgue, këshilltar bashkiak i Cap Ferret, theksoi se i gjithë procesi u zhvillua pa pengesa, duke kujtuar se një stërvitje e ngjashme ishte organizuar në vitin 2025, pas zjarreve katastrofike të vitit 2022. Plani i vënies në siguri, i aprovuar në korrik të vitit 2023, i jep përparësi grupeve më vulnerabël dhe parashikon aktivizimin e një evakuimi masiv detar në rast se flakët bllokojnë rrugën D106, për të shmangur izolimin e popullsisë në gadishull.
Gjatë muajve të verës, gadishulli Cap Ferret mikpret deri në 150 mijë vizitorë, një shifër që e kthen këtë operacion në një provë të madhe për kapacitetet e emergjencës franceze.
Sipas skenarëve të emergjencës, nëse situata e kërkon, mund të mobilizohen të paktën 27 anije pasagjerësh dhe 33 autobusë për të dërguar të evakuuarit drejt qendrave të strehimit në Arcachon. Kapaciteti i planifikuar arrin në 12 mijë persona gjatë 24 orëve të para dhe deri në 14 mijë persona në ditët në vijim.
