I ngarkuari me punë në Ambasadën e Shteteve të Bashkuara të Amerikës në Kosovë, Nicholas Giacobbe, është takuar me kryeministrin Albin Kurti dhe zëvendëskryeministrin Besnik Bislimi.
Pas takimit, ai shkroi në Twitter se diskutuan, mes tjerash, që marrëveshja finale me Serbinë të arrihet gjatë këtij mandati të Kurtit.
“Ishte kënaqësi takimi me kryeministrin Kurti dhe zëvendëskryeministrin Bislimi sot për të diskutuar një gamë të gjerë çështjesh, përfshirë planet për të arritur një marrëveshje gjithëpërfshirëse me Serbinë gjatë mandatit aktual të kryeministrit”, shkroi Giacobbe.
EUSR Lajčák is right, it’s high time for real progress on the Kosovo-Serbia Dialogue. #GetItDone ???? #RealProgress https://t.co/9rBMdafc01
— Chargé d’Affaires Nicholas J. Giacobbe, Jr (@USAmbKosovo) November 17, 2021
Dje, në një intervistë për Radion Evropa e Lirë, Kurti tha se është e pritshme që marrëveshja përfundimtare mes Kosovës dhe Serbisë të arrihet gjatë mandatit të tij si kryeministër.
“Unë nuk mund të parashikoj se kur do të ndodhë, por nëse kemi parasysh që mandati i presidentit amerikan, (Joe) Biden, mandati i zëvendëskryetarit të Komisionit Evropian, Borrell dhe mandati im përafërsisht do ta kenë të njëjtën kohëzgjatje, është e pritshme që në kuadër të këtyre mandateve, që në kohë janë pak a shumë të njëjta, ta përmbyllim marrëveshjen gjithëpërfshirëse me Serbinë. Pra, te ne ekziston vullneti dhe interesimi, varet a ekziston gatishmëria te Serbia”, tha Kurti.
Dje, Giacobbe ka shprehur mbështetjen e tij për emisarin e Bashkimit Evropian për dialogun Kosovë-Serbi, Miroslav Lajçak, i cili tha se ka ardhur koha që të bëhet përparim i vërtetë në dialog. Ai ka shkruar në Twitter se Kosova dhe Serbia duhet ta përfundojnë këtë punë.
“Përfaqësuesi special i BE-së për dialogun Kosovë – Serbi, Mirsolav Lajçak ka të drejtë, është koha e fundit për përparim të vërtetë në dialogun Kosovë – Serbi. Përfundojeni”, ka shkruar Giacobbe./Express
