Janë zbardhur amendamentet e propozuara nga Partia Socialiste për ndryshimin e Kodit Rrugor, ndryshime që janë propozuar nga deputetët Ulsi Manja dhe Erion Braçe.
Ndryshimet parashikojnë masa më të ashpra për drejtuesit e mjeteve, veçanërisht për shoferët e rinj, personat që drejtojnë automjetin pa patentë dhe ata që kapen në timon nën efektin e alkoolit.
Të lidhura
None found
Sipas amendamenteve, çdo person që kapet duke drejtuar mjetin pa patentë nuk do të mund të pajiset me leje drejtimi për një periudhë 1-vjeçare, përveç përgjegjësive që parashikon legjislacioni penal në fuqi.
Për të miturit që kapen në timon pa e marrë kurrë patentën, masa bëhet edhe më e ashpër. Ata nuk do të mund ta marrin patentën në moshën 18-vjeçare, por vetëm pasi të mbushin 20 vjeç.
Një tjetër ndryshim lidhet me drejtuesit e rinj të mjeteve. Gjatë vitit të parë të patentës, shoferët do të duhet të kenë tolerancë zero ndaj alkoolit gjatë drejtimit të automjetit. Po ashtu, propozohet kufizim i lëvizjes për shoferët e rinj deri në dy vite eksperiencë.
Ata nuk do të lejohen të drejtojnë automjetin nga ora 24:00 deri në 06:00 pa praninë e një personi të rritur që disponon patentë prej të paktën tre vitesh. Nëse drejtuesi i ri nuk kryen asnjë shkelje brenda një viti, kufizimet hiqen automatikisht. Por në rast se kryen dy shkelje gjatë periudhës së provës, faza e testimit zgjatet edhe me një vit tjetër.
Amendamentet parashikojnë edhe ulje të kufirit të shpejtësisë. Shpejtësia maksimale në autostradë propozohet të jetë 90 km/h, ndërsa në rrugët jashtë qendrave të banuara 80 km/h.
Për shkelësit parashikohen gjoba nga 5 mijë deri në 15 mijë lekë, pezullim patente për një muaj dhe heqje pikësh sipas akteve nënligjore në fuqi.
Një tjetër risi është ndalimi i përdorimit të celularit gjatë drejtimit të biçikletave dhe motorëve elektrikë.
Ndërkohë, për drejtuesit që kapen në timon me nivel alkooli mbi 0.5 gram/litër në gjak dhe që janë ndëshkuar më parë për të njëjtën shkelje, propozohet heqja përfundimtare e patentës.
