Kryetari i Partisë Demokratike të Kosovës, Bedri Hamza, zhvilloi sot një takim me Ambasadorin e Gjermanisë në Kosovë, Rainer Rudolph. Gjatë bisedës u trajtuan zhvillimet politike, kriza institucionale dhe sfidat që po përballet Kosova.
Të lidhura
None found
Sipas njoftimit të PDK-së, palët diskutuan për rëndësinë e konstituimit sa më të shpejtë të Kuvendit, zbatimin e rendit kushtetues dhe sundimin e ligjit. Në takim u fol gjithashtu për zhvillimin ekonomik dhe përparimin e Kosovës drejt proceseve integruese.
Hamza deklaroi se funksionimi i institucioneve dhe respektimi i Kushtetutës nuk mund të varen nga vullneti politik i një partie apo individi. Sipas tij, këto përbëjnë detyrime institucionale dhe bazën e demokracisë.
Kreu i PDK-së i shprehu ambasadorit gjerman shqetësimin për precedentin e krijuar nga refuzimi i partisë që ka marrë më shumë vota në zgjedhje për të zbatuar vendimet e Gjykatës Kushtetuese.
“Kryetari Hamza rikonfirmoi vendosmërinë e PDK-së për të përdorur të gjitha mjetet demokratike dhe institucionale në mbrojtje të Kushtetutës, institucioneve të Republikës dhe interesit të qytetarëve”, thuhet në njoftimin e PDK-së.
Hamza nënvizoi se Partia Demokratike e Kosovës do të vijojë angazhimin për një shtet demokratik, funksional dhe me zhvillim ekonomik, të integruar në strukturat euroatlantike dhe me marrëdhënie të ngushta me aleatët strategjikë.
