Anëtari i LDK-së, Bajram Gecaj, ka reaguar ndaj deklaratës së Ivica Daçiqit se flamuri serb “herët a vonë” do të valëvitet mbi Prizren.
Të lidhura
None found
Sipas Gecajt, deklarata të tilla nuk mund të konsiderohen thjesht si pjesë e retorikës elektorale. Ai ka kërkuar që institucionet e Kosovës t’i trajtojnë me kujdes, vigjilencë dhe vendosmëri.
Gecaj ka nënvizuar gjithashtu domosdoshmërinë e një marrëveshjeje të gjerë kombëtare për çështjet që lidhen me interesin shtetëror. Ai ka theksuar se sovraniteti, siguria dhe integriteti territorial duhet të kenë përparësi ndaj çdo interesi partiak.
“Partitë vijnë e shkojnë, qeveritë ndërrohen, liderët kalojnë, por Kosova duhet të mbetet mbi të gjithë ne!”, ka shkruar Gecaj.
Në reagimin e tij, ai ka kundërshtuar pretendimet për rikthimin e Kosovës nën kontrollin e Serbisë, duke vlerësuar se deklaratat e tilla janë të lidhura me trashëgiminë politike të Beogradit të vjetër.
Gecaj ka shkruar se dëshira e shprehur nga Ivica Daçiqi që flamuri serb të valëvitet në Prizren “shpejt” mund të jetë pjesë e diskursit elektoral, por nuk duhet të shpërfillet. Sipas tij, ambiciet territoriale të Serbisë në të kaluarën kanë nisur si deklarata politike, janë forcuar përmes propagandës nacionaliste dhe, në rrethana të caktuara, kanë kaluar në politika shtetërore me pasoja tragjike për popujt e Ballkanit.
Ai ka bërë thirrje për vëmendje të shtuar dhe reagim të matur, por të qartë, ndaj këtyre qëndrimeve. Sipas Gecajt, Daçiqi dhe figura të tjera të politikës së vjetër serbe vazhdojnë të mbeten të lidhura me trashëgiminë e Slobodan Millosheviqit dhe nuk e kanë pranuar realitetin historik e politik se Kosova është shkëputur përfundimisht nga sundimi i Serbisë.
“Historia nuk kthehet prapa vetëm sepse dikush refuzon ta pranojë atë”, ka theksuar ai, duke shtuar se përpjekjet për ta rikthyer Kosovën nën tutelën e Beogradit mbeten dëshira të parealizuara.
Gecaj ka përsëritur bindjen e tij, të shprehur edhe para, gjatë dhe pas intervenimit të NATO-s, si dhe në takimet me përfaqësues ndërkombëtarë, se Serbia ka nevojë për një proces të thellë denacifikimi politik.
Ai e ka përshkruar këtë proces si përballje me të kaluarën, çrrënjosje të ideologjisë ekspansioniste dhe shkëputje të plotë nga trashëgimia e Millosheviqit. Sipas tij, pa një transformim demokratik e institucional, pranim të përgjegjësisë historike dhe respektim të sovranitetit të shteteve fqinje, paqja dhe stabiliteti afatgjatë në Ballkan do të vazhdojnë të jenë të brishta.
Gecaj ka kërkuar nga bashkësia ndërkombëtare që të mos e zëvendësojë kërkesën për ndryshim të vërtetë me tolerimin dhe përkëdheljen e nacionalizmit serb.
Ai ka vlerësuar se përgjegjësia nuk lidhet vetëm me Serbinë, por edhe me vetë Kosovën. Sipas tij, qytetarët dhe institucionet e vendit kanë detyrim historik, moral dhe shtetëror të dëshmojnë se propaganda e Millosheviqit dhe e rrethit të tij, sipas së cilës shqiptarët nuk do të dinin ta qeverisnin shtetin, është e pavërtetë.
“Përgjigjja jonë më e fuqishme ndaj kësaj propagande nuk është vetëm fjala, por ndërtimi i një shteti demokratik, funksional, të drejtë, të sigurt dhe të respektuar ndërkombëtarisht”, ka shkruar ai.
Në këtë kuadër, Gecaj ka theksuar nevojën për konsensus kombëtar mbi çështjet jetike të shtetit. Ai ka pranuar se dallimet politike, ideologjike dhe partiake janë pjesë e demokracisë, ashtu si debatet për qeverisjen, ekonominë, drejtësinë dhe politikat publike.
Megjithatë, sipas tij, për çështje që lidhen me sovranitetin, integritetin territorial, sigurinë kombëtare, orientimin euroatlantik dhe aleancat strategjike, gara partiake duhet t’i lërë vendin përgjegjësisë ndaj Republikës.
“Kosova nuk është pronë e asnjë qeverie, e asnjë partie dhe e asnjë lideri politik. Kosova është përgjegjësi e përbashkët e të gjithë neve!”, ka deklaruar Gecaj.
Ai ka kërkuar që temat e interesit kombëtar të mos përdoren për fushata zgjedhore apo për përfitime të përkohshme politike. Sipas tij, konsensusi për këto çështje duhet të arrihet para zgjedhjeve, të ruhet gjatë procesit zgjedhor dhe të zbatohet edhe pas përfundimit të tij.
Gecaj ka thënë se cilido që vendos interesin partiak mbi atë shtetëror duhet të përballet me vlerësimin demokratik të qytetarëve. Ai ka shtuar se Serbia nuk duhet ta gjejë Kosovën të përçarë kur bëhet fjalë për të ardhmen e vendit.
“Nuk kërkohet të mendojmë njësoj për gjithçka, por kërkohet të qëndrojmë së bashku për atë që na bashkon: lirinë, pavarësinë, demokracinë, sovranitetin dhe të ardhmen e Republikës sonë”, ka shkruar ai.
Në përfundim, Gecaj ka theksuar se shteti nuk mjafton vetëm të fitohet, por duhet të ruhet, të ndërtohet dhe t’u përcillet brezave të ardhshëm më i fortë se sa është trashëguar.
“Partitë vijnë e shkojnë, qeveritë ndërrohen, liderët kalojnë, por Kosova duhet të mbetet mbi të gjithë ne!”, ka përfunduar ai.
