Aktiviteti shpërthyes i vullkanit Anak Krakatau ka sjellë pengesa të konsiderueshme për trafikun ajror në Indonezi. Në aeroportin kryesor ndërkombëtar të Xhakartës janë pezulluar 209 fluturime.
Të lidhura
None found
Të dielën në mëngjes, në hapësirën ajrore pranë Aeroportit Ndërkombëtar Soekarno-Hatta u konstatua prania e hirit vullkanik, duke ndikuar te më shumë se 22 mijë udhëtarë. Fluturimet më të prekura janë ato drejt Singaporit dhe nga ky destinacion, por ndërprerjet kanë përfshirë edhe linja të tjera ndërkombëtare, mes tyre Doha, Sidnei dhe Kuala Lumpur. Pezullimi i operacioneve u zgjat deri në orën 13:30.
Anak Krakatau shfaqi aktivitet të fortë që vonë të premten. Sipas autoriteteve, janë evidentuar shpërthime të njëpasnjëshme, lëkundje sizmike, rrjedha lave dhe zhurma të fuqishme në zonat përreth. Herët të dielën u regjistruan edhe dy shpërthime të tjera.
Aktiviteti i fundit i vullkanit nuk ka sjellë paralajmërim për cunami. Megjithatë, hiri vullkanik ka krijuar vështirësi edhe për banorët pranë zonës së vullkanit. Ministria e Shëndetësisë u ka kërkuar qytetarëve të qëndrojnë në ambiente të mbyllura dhe të vendosin maska, për të shmangur irritimet në sy, lëkurë dhe rrugët e frymëmarrjes.
Disa shkolla kanë ndërprerë aktivitetet, pasi banorë dhe nxënës kanë raportuar irritim të syve. Për shkak të hirit, edhe peshkatarët kanë pezulluar daljet e tyre në det.
I quajtur “Fëmija i Krakatoas”, Anak Krakatau ndodhet në Ngushticën Sunda, ndërmjet ishujve Java dhe Sumatra. Ai u bë veçanërisht i njohur në dhjetor 2018, kur shembja e një pjese të vullkanit shkaktoi një cunami që mori jetën e më shumë se 400 personave.
Indonezia shtrihet në Unazën e Zjarrit të Paqësorit, një prej rajoneve më aktive në botë për tërmete dhe shpërthime vullkanike.
