Ish-lideri i Venezuelës, Nicolas Maduro, së bashku me bashkëshorten e tij Celia Flores, ranë në prangat e forcave amerikane gjatë një aksioni ushtarak në Karakas në muajin janar. Pas ndalimit, çifti u ekstradua drejt Shteteve të Bashkuara dhe prej asaj kohe qëndron në paraburgim në një qendër federale në zonën e Brooklyn-it.
Të lidhura
None found
Ata përballen me një proces ligjor në Nju Jork, ku Maduro akuzohet për katër vepra penale, përfshirë edhe atë të narkoterrorizmit, sipas një padie të ngritur kundër tij dhe ish-bashkëpunëtorëve të tij. Seancat gjyqësore për Maduron dhe Flores janë planifikuar të fillojnë më 1 qershor 2027, një datë e konfirmuar nga gjykata federale atje në fund të korrikut.
Mirëpo, përpara se të nisë gjykimi, ish-presidenti ka ndërmarrë një veprim ligjor për të hedhur poshtë të gjitha akuzat. Ai i është drejtuar gjykatësit federal Alvin Hellerstein me një kërkesë për të rrëzuar aktakuzën që lidhet me trafikun ndërkombëtar të drogës dhe terrorizmin e lidhur me narkotikët.
Në memorandum që mbrojtja e tij i ka depozituar magjistratit Hellerstein, theksohet se sistemi gjyqësor i ShBA-së nuk ka juridiksion për të gjykuar penalisht as atë dhe as bashkëshorten e tij. Avokatët mbështeten në argumentin kryesor se Maduro gëzon imunitet ligjor për shkak të postit të tij si ish-kryetar i një shteti të huaj, duke kërkuar kështu mbylljen e çështjes.
